თბილისი, 25 აპრილი — Sputnik. საქართველოს ექს-პრეზიდენტი, ოდესის ოლქის გუბერნატორი მიხეილ სააკაშვილი დარწმუნებულია, რომ საქართველოში „ერთიანი ნაციონალური მოძრაობა“ საპარლამენტო არჩევნებზე გაიმარჯვებს, რის შემდეგაც ის სამშობლოში დაბრუნებას აპირებს.
„დარწმუნებული ვარ გამარჯვებაში, ამაში საერთოდ ეჭვიც არ მეპარება. არის ორი ძალა, ერთი უკავშირდება ბიძინა ივანიშვილს, მეორე მიკავშირდება მე. არ არსებობს ამ ეტაპზე მესამე არაფერი. ყველა დანარჩენი იმიტაციაა“, — განაცხადა სააკაშვილმა ტელეკომპანია „რუსთავი 2“-ის ეთერში.
ექს-პრეზიდენტის სიტყვებით, არჩევნების შემდეგ ის სამშობლოში დაბრუნებას გეგმავს, თუმცა „უკრაინაში მისიის“ მიტოვებას არ აპირებს.
„ბევრი დრო აღარ რჩება. მუდმივად გვაქვს კონსულტაციები ჩემ მეგობრებთან, ბევრი ჩამოდის და ვხვდები… აუცილებლად ვიპოვი დროს, რომ ჩავერთო აქტიურად არჩევნებში და არჩევნების შემდეგ, დარწმუნებული ვარ, ჩამოვალ საქართველოში, მაგრამ ეს არ ნიშნავს, რომ უარს ვამბობთ იმ დიდ მისიაზე, რომელიც ჩვენ გვაქვს უკრაინაში… ეს არ არის არჩევანი — საქართველო თუ უკრაინა, ეს არის არჩევანი — საერთო საუკეთესო მომავალი“, — განაცხადა სააკაშვილმა.
სააკაშვილმა საქართველო საპრეზიდენტო არჩევნების შემდეგ, 2013 წლის ნოემბერში დატოვა. 2015 წლის მაისში ის ოდესის ოლქის გუბერნატორად დაინიშნა, მანამდე მან უკრაინის მოქალაქეობა მიიღო.
