ბელგიის დედაქალაქში სამშაბათს, დილით ტერაქტების სერია მოხდა. ორი აფეთქება ბრიუსელის საერთაშორისო აეროპორტში და ორიც ქალაქის „ევროპულ“ კვარტალში, „მალბეკისა“ და „შუმანის“ მეტროს სადგურებში განხორციელდა.
ბოლო მონაცემებით, ტრაგედიას 30 ადამიანის სიცოცხლე ემსხვერპლა, ათობით ადამიანმა კი სხეულის დაზიანებები მიიღო. ბრიუსელის ტერაქტებთან დაკავშირებით ევროპის დედაქალაქებში უსაფრთხოების ზომები გაძლიერებულია, ავტომატური იარაღით შეიარაღებული პოლიცია აეროპორტებსა და ქუჩებში პატრულირებს.
ბელგიური ტელევიზიის ინფორმაციით, პოლიციამ ბრიუსელის „გაწმენდილ“ აეროპორტში შაჰიდის სამი ქამარი აღმოაჩინა, რომლებიც მოქმედებაში არ იყვნენ მოყვანილი. სამართალდამცველი ორგანოებიდან სანდო წყაროს სიტყვებით, პოლიცია ვარაუდობს, რომ აფეთქებები შეიძლება თვითმკვლელებმა განახორციელეს.
ტერაქტებთან დაკავშირებით ბელგიის ხელისუფლებამ საფრანგეთთან საზღვრის დაკეტვის გადაწყვეტილება მიიღო: ორ ქვეყანას შორის შეჩერებულია ავტობუსებისა და მატარებლების გადაადგილება. გარდა ამისა, გაძლიერებულია ბირთვული ობიექტების კონტროლი. ევროპული საინფორმაციო საშუალებების ინფორმაციით, ბელგიამ საზღვრები ყველა მიმართულებით დაკეტა.
მანამდე ვრცელდებოდა ინფორმაცია, რომ აფეთქებების სერიის შემდეგ, რომელსაც ტერაქტის კვალიციკაცია მიენიჭა, ბელგიის ხელისუფლებამ ქვეყანაში ტერორისტული საფრთხის მეოთხე, მაქსიმალური დონის დაწესების შესახებ განკარგულება გასცა. ბრიუსელში დაკეტილია მეტროს სადგურები, ფაქტობრივად შეწყვეტილია საზოგადოებრივი ტრანსპორტის მუშაობა, იხურება სკოლები და სხვა საბავშვო დაწესებულებები, გაკეთდა განცხადება საზღვრის ჩაკეტვის შესახებ. გავრცელდა ინფორმაცია სამხრეთი სადგურიდან ხალხის ევაკუაციის შესახებ, სადაც, ძირითადად, პარიზიდან მომავალი მატარებლები ჩამოდიან.
