თბილისი, 12 მარტი — Sputnik. საქართველოს პრემიერ-მინისტრმა გიორგი კვირიკაშვილმა ოპოზიციის ერთ-ერთი ლიდერის სექსუალური ცხოვრების ამსახველ ვიდეოჩანაწერთან დაკავშირებით, რომელიც გუშინ გამოქვეყნდა, განაცხადა, რომ პირობას დებს, ყველაფერს გაააკეთებს, რათა ეს საშინელი ჩანაწერები ერთხელ და სამუდამოდ გაქრეს, იუწყება პრემიერის პრეს-სამსახური.
საქართველოს მთავარმა პროკურატურამ პარასკევს ინტერნეტის საშუალებით სექსუალური ხასიათის კადრების გავრცელების ფაქტზე სისხლის სამართლის საქმე აღძრა. Youtube-ზე ატვირთული კადრები პორტალზე სახელმწიფო უსაფრთოების სამსახურმა გუშინვე დაბლოკა.
„ის, რაც დღეს მოხდა, არის არა ერთი ადამიანის, არამედ მთელი საზოგადოების დაშანტაჟებისა და დათრგუნვის მცდელობა. ეს არის დარტყმა სახელმწიფოზე, და ჩვენი პასუხი ამ დარტყმაზე იქნება უმკაცრესი!“ — თქვა პრემიერმა.
კვირიკაშვილის განცხადებით, მან შესაბამის უწყებებს ამ საქმის უსწრაფესად გამოძიების დავალება მისცა. „ეს არის საგამოძიებო უწყებების გამოცდა, რომელიც მათ უნდა ჩააბარონ“, — აღნიშნა მან.
პრემიერმა განაცხადა, რომ დამნაშავე, ვინც არ უნდა იყოს ის, პასუხს კანონის წინაშე უმკაცრესად აგებს. „ეს იქნება სამაგალითო პასუხი, რომ მსგავსი სიბინძურე თავში აღარავის მოუვიდეს!.. სიტყვას გაძლევთ, ყველაფერს გავაკეთებ, რომ ჩვენი ცხოვრებიდან ეს საშინელი ჩანაწერები ერთხელ და სამუდამოდ გაქრეს“, — თქვა კვირიკაშვილმა.
ამ ფაქტს ასევე გამოეხმაურა საქართველოს პარლამენტის თავმჯდომარე დავით უსუფაშვილი. სპიკერმა მსგავსი ფაქტების წინააღმდეგ ბრძოლა ტერორისტული დანაშაულის წინააღმდეგ ბრძოლას გაუთანაბრა და პირადი ცხოვრების ამსახველი ვიდეოკადრების გავრცელების საქმის გამოძიების მიზნით საერთაშორისო ანტიტერორისტული ორგანიზაციებისთვის მიმართვისა და კადრების გამავრცელებლის შესახებ ინფორმაციის მიწოდებისთვის ჯილდოს სახით 1 მლნ ლარის დაწესების წინადადებით გამოვიდა.
