თბილისი, 6 მარტი — Sputnik. 10 მარტიდან იაშვილის ბავშვთა ცენტრალურ საავადმყოფოში მშობელთა სკოლა იხსნება, ნათქვამია კლინიკის გვერდზე სოციალურ ქსელში Facebook.
საავადმყოფოს წამყვანი პედიატრები ყოველი კვირის ხუთშაბათ დღეს მშობლებისათვის სხვადსხვა აქტუალურ თემებზე უფასო ღია გაკვეთილებს ჩაატარებენ.
სოციალური პროექტი ერთი წლის განმავლობაში გაგრძელდება და მიზნად ისახავს მშობლების ინფორმირებულობის გაზრდას კონკრეტული დაავადებებისა და გადაუდებელი მდგომარეობების შესახებ. სალექციო თემები წინასწარ არის განსაზღვრული და მშობლებს შესაძლებლობა აქვთ თავად აირჩიონ მათთვის საინტერესო გაკვეთილი.
უფასო ლექციაზე დასასწრებად აუცილებელია ტელეფონის ან ელექტრონული ანკეტის მეშვეობით განხორციელდეს რეგისტრაცია, თითოეულ ლექციაზე დამსწრე მშობელთა რაოდენობა 50 ადამიანამდეა შეზღუდული.
