თბილისი, 19 თებერვალი — Sputnik. საქართველოს თავდაცვის მინისტრის, თინა ხიდაშელის მიმართ მმართველი კოალიციის დეპუტატის, გოგი თოფაძის ბრალდება მიუღებელია, — განაცხადა პრემიერ–მინისტრმა გიორგი კვირიკაშვილმა მთავრობის სხდომაზე.
შეგახსენებთ: გასულ კვირაში გოგი თოფაძემ ბრალი დასდო მინისტრ თინა ხიდაშელს, რომ ამ უკანასკნელმა საგარეჯოში შუალედური საპარლამენტო არჩევნებისას ხმები გააყალბა და ამით მმართველი კოალიცია „ქართული ოცნება“ შეარცხვინა.
„თავდაცვის მინისტრის მიმართ ბრალდებები არის აბსოლუტურად მიუღებელი და ჩირქს სცხებს არა ერთ პარტიას, არამედ მთლიანად მთავრობას. შეკითხვები, ალბათ, სხვა წესით და სხვა ფორმატში უნდა განიხილებოდეს“, — ციტირებს გიორგი კვირიკაშვილს მთავრობის პრესსამსახური.
პრემიერის თქმით, მთავრობამ არ უნდა იფიქროს მმართველი კოალიციის დაშლაზე, რაც სალაპარაკოს მისცემს „იმ ადამიანებს, რომლებსაც ეს ნამდვილად უხარიათ“.
„მზად ვართ, კარი გავუღოთ ყველა ადამიანს, ვინც ჩვენთან ერთად აიღებს ტვირთს, რომელიც არ არის მსუბუქი და იმ პრინციპებით და იმ ხედვით ემსახურება ქვეყანას, რომლითაც ჩვენ მივდივართ წინ“, — დაამატა გიორგი კვირიკაშვილმა.
მანამდე კი „რესპუბლიკელმა“ დავით ბერძენიშვილმა, რომლის თანაპარტიელიც გახლავთ თინა ხიდაშელი, განაცხადა, რომ თოფაძეს მოუწევს პასუხი აგოს თავდაცვის მინისტრის მიმართ გაკეთებულ ბრალდებებზე.
