თბილისი, 14 თებერვალი — Sputnik. ირანიდან საქართველოში ბუნებრივი აირის მიწოდება ტექნიკურად შესაძლებელია, განაცხადა ირანის ელჩმა საქართველოში აბას თალები-ფარმა.
როგორც ელჩმა აღნიშნა, არსებობს განსაზღვრული მარშრუტები, რომელთა საშუალებითაც ირანული გაზის საქართველოში მიწოდება შესაძლებელია.
„ის, რომ ასეთი შესაძლებლობა არსებობს, ვადასტურებ. რა თქმა უნდა, ეს ტექნიკურად აუცილებლად უნდა დამუშავდეს. ამაზე ექსპერტებმა და სპეციალისტებმა უნდა იმუშაონ. შეიძლება იგივე სომხური მარშრუტის გამოყენება, შეგვიძლია აზერბაიჯანული ინფრასტრუქტურის გამოყენება. არსებობს ასევე მესამე შესაძლებლობაც — სვოპის პრინციპით და ამ შემთხვევაში თანამშრომლობა ირანს, საქართველოს, რუსულ „გაზპრომსა“ და სომხეთს შორის უნდა წარიმართოს“, — განაცხადა ელჩმა.
მისი განცხადებით, ეს უკანსკნელი ყველაზე რეალური ვარიანტია.
საქართველოში ირანული გაზის მოწოდება აბსოლუტურად რელურია, თუ ტარიფი მისაღები აღმოჩნდება, მიიჩნევს საქართველოს ნავთობპროდუქტების იმპორტიორთა კავშირის ხელმძღვანელი ივანე მთვრალაშვილი.
„ბუნებრივია, შესაძლებელია ტექნიკური საკითხების განხილვა. ვიტყვით, რა ეტაპზე შეიძლება ამის გადაწყვეტა, მაგრამ ბუნებრივი აირის იმპორტი ირანიდან აბსოლუტურად რეალურია. მთავარია ტარიფი, რამდენად იქნება ის კონკურენტული აზერბაიჯანულ გაზთან შედარებით. თუ კონკურენტული იქნება, რა თქმა უნდა, შესაძლებელია. თუმცა ეს უფრო პერსპექტივა, ხვალინდელი დღეა“, — განაცხადა მთვრალაშვილმა.
საქართველოში დღე-ღამეში დაახლოებით 11 მლნ კუბომეტრი ბუნებრივი აირი შემოდის. მათგან 6 მლნ აზერბაიჯანული გაზია მილსადენ „ყაზახიდან“, 3,2 მლნ — „შაჰ-დენიზ-1“-ის (სამხრეთ კავკასიური მილსადენი) ფაზის ფარგლებში, დანარჩენ 1,5-2 მლნ კუბმეტრს სომხეთში რუსული გაზის ტრანზიტის საფასურად იღებს.
ბოლო ორ წელიწადში საქართველოში ბუნებრივ აირზე მოთხოვნილების გაზრდის გამო, ცისფერ საწვავზე შეიძლება დეფიციტი გაჩნდეს.
ამის პარალელურად საქართველო მოლაპარაკებებს აწარმოებს რუსულ „გაზპრომთან“, რომელმაც რუსეთიდან სომხეთში ბუნებრივი აირის ტრანზიტისთვის ფულით გადახდის წინადადება წამოაყენა. გასული ხელშეკრულების ვადა 2015 წლის 31 დეკემბერს ამოიწურა.
