თბილისი, 1 თებერვალი — Sputnik. საქართველოს პრეზიდენტის გიორგი მარგველაშვილის გამოსვლის შემდეგ, აუცილებელია პარლამენტში დებატების გამართვა, თვლის ოპოზიციური ფრაქცია „თავისუფალი დემოკრატების“ დეპუტატი ზურაბ აბაშიძე.
საქართველოს პრეზიდენტის ყოველწლიური გამოსვლა საგაზაფხულო სესიის პირველი პლენარული სხდომის დროს გაიმართება.
„რა თქმა უნდა დებატების ფორმატი აუცილებელია იმისათვის, რომ პოლიტიკურმა ძალებმა, მათ შორის ხელისუფლების წარმომადგენლებმა თავიანთი პოზიცია დააფიქსირონ. ასევე პრინციპიალურად მიმაჩნია, რომ გამოსვლას მთავრობის წარმომადგენლებიც ესწრებოდნენ“, — უთხრა აბაშიძემ ჟურნალისტებს ტელეკომპანია „იმედის“ ეთერში.
იმის შესახებ, რომ პრეზიდენტის გამოსვლას პარლამენტში მთავრობის წევრებიც უნდა ესწრებოდნენ, ასევე ისაუბრა დამოუკიდებელმა დეპუტატმა, ოპოზიციონერმა ზურაბ ჯაფარიძემ. ამასთან მან აღნიშნა, რომ პრეზიდენტმა განსაკუთრებით უნდა გაამახვილოს ყურადღება ეკონომიკურ საკითხებზე.
„რა თქმა უნდა მნიშვნელოვანია, რომ იყოს დებატები, იმისათვის, რომ პარლამენტში არსებულმა პოლიტიკურმა ჯგუფებმა თავიანთი პოზიცია დააფიქსირონ“, — თქვა ჯაფარიძემ „იმედის“ ეთერში.
საქართველოს ახალმა პრემიერ-მინისტრმა გიორგი კვირიკაშვილმა თავისი წინამორბედისაგან განსხვავებით, მზადყოფნა გამოთქვა სახელმწიფოს მეთაურის ყოველწლიურ გამოსვლას დაესწროს.
