მოკლული პროკურორი შეიძლება კუჭავას ერთადერთი მსხვერპლი არ იყოს

თბილისი, 19 იანვარი – Sputnik. სამეგრელო-ზემო სვანეთის პროკურორის მკვლელობაში ეჭვმიტანილი რადიო „საქართველოს ხმის“ დირექტორი ბიძინა კუჭავა, შესაძლოა, კიდევ სამ მკვლელობასთან იყოს კავშირში, განაცხადა ტელეკომპანია „მაესტროს“ ეთერში შს მინისტრის მოადგილემ არჩილ თალაკვაძემ. 

სამეგრელო-ზემო სვანეთის საოლქო პროკურატურის უფროსი პროკურორი ვახტანგ ქირია 16 იანვარს თბილისში, ქავთარაძის ქუჩაზე, კუჭავას მიერ დაქირავებულ ბინაში გარდაცვლილი იპოვეს. მას შემდეგ, რაც შსს-მ სავარაუდო მკვლელის სამძებრო ოპერაცია დაიწყო, საპატრულოს თანამშრომლებმა კუჭავას ავტომობილი გააჩერეს და სწორედ ამ დროს კუჭავამ მასზე რეგისტრირებული იარაღით თავი მოიკლა.

„კუჭავას მიერ ჩდენილი მკვლელობის შემდეგ, ლეგიტიმური კითხვები ჩნდება სხვა ოთხ საქმესთან დაკავშირებით — მისი ნათესავის მკვლელობა, მისი დის გაუჩინარება, რომელიც რამდენიმე წლის წინ უგზოუკვლოდ დაიკარგა, ცოლ-ქმარ ნინუებისა და გიორგი მახალთაძის მკვლელობები“, — განაცხადა თალაკვაძემ. შსს-ს მაღალჩინოსნის განცხადებით, ყველა ეს შემთხვევა 2005-2009 წლებში მოხდა და ამ დრომდე გაუხსნელია.

სახელმწიფოუსაფრთხოების მინისტრი თამაზ ნინუა და თავისი მეუღლე 2009 წლის 14 ნოემბერს საკუთარ ბინაში მოკლულები იპოვეს. მათ მკვლელობაში 60 წლის მამაკაცი იქნა ბრალდებული, რომელიც დანაშაულს არ აღიარებს.

2007 წლის მაისში საკუთარ ბინაში იპოვეს აგრეთვე გიორგი მახალთაძის გვამი, რომელიც თავის არეში მოხვედრილი ტყვიით გარდაიცვალა. წინასწარი ინფორმაციით, მკვლელობის მიზეზი აზარტული თამაშები იქცა.