თბილისი, 6 აგვისტო — Sputnik. ავტოიმპორტიორებს 2020 წლის 1 მაისამდე შემოყვანილი ავტომობილების განბაჟების ვადა გაუხანგრძლივდათ, იუწყება შინაგან საქმეთა სამინისტროს მომსახურების სააგენტო.
უწყების ცნობით, იმპორტიორები მათ განბაჟებას შეძლებენ ნებისმიერ დროს 1 სექტემბრამდე და დაგვიანების გამო სანქციები არ დაეკისრებათ.
„მომსახურების სააგენტო მოუწოდებს მოქალაქეებს, რომლებსაც სატრანსპორტო საშუალებები შემოყვანილი ჰყავთ 2020 წლის 1 მაისამდე, რიგისა და საჯარიმო სანქციების თავიდან აცილების მიზნით, დროულად მიმართონ მომსახურების სააგენტოს და 31 აგვისტოს ჩათვლით განახორციელონ საბაჟო პროცედურები“, – აღნიშნულია განცხადებაში.
მომსახურების სააგენტო მოქალაქეებს მოუწოდებს, სრულად გაითვალისწინონ ჯანდაცვის სამინისტროს რეკომენდაციები და სერვისების მისაღებად ადგილზე გამოცხადდნენ პირბადით.
ავტომობილების იმპორტიორებისთვის შეღავათების გაგრძელების გადაწყვეტილება კორონავირუსის გავრცელების პრევენციის მიზნით შექმნილმა უწყებათშორისმა საკოორდინაციო საბჭომ მიიღო.
