თბილისი, 1 აგვისტო — Sputnik. საქართველოში მარიხუანას ლეგალიზების წინააღმდეგია გამოკითხულთა 74% — სოციოლოგიური გამოკითხვა ჩაატარა აშშ-ის ეროვნული დემოკრატიული ინსტიტუტმა (NDI).
ქირურგი მარიხუანის ზემოქმედების ქვეშ — სერგეენკოს კოშმარული სიზმარი >>
მარიხუანას ლეგალიზებას დაუჭირა მხარი რესპონდენტთა 18%-მა.
საზოგადოებრივი აზრის კვლევა საქართველოში 23 ივნისიდან 8 ივლისამდე პერიოდში ჩატარდა. ხოლო 31 ივლისს საქართველოს საკონსტიტუციო სასამართლომ „გირჩის“ წევრების ზურაბ ჯაფარიძისა და ვახტანგ მეგრელიშვილის პარლამენტის წინააღმდეგ ერთობლივი სარჩელი დააკმაყოფილა, რითიც მარიხუანას მოხმარებისთვის ერთადერთი დარჩენილი ადმინისტრაციული სასჯელი — 500-ლარიანი ჯარიმა გააუქმა. სასამართლომ მიიჩნია, რომ ეს საკითხი — პიროვნების თავისუფალი განვითარების სფეროა.
გამოკითხვა პირდაპირი ინტერვიუს მეთოდით ჩატარდა, სულ გამოიკითხა 2,9 ათასზე მეტი ადამიანი. ცდომილება 1,9%-ს შეადგენს.
რაც შეეხება საკონსტიტუციო სასამართლოს გადაწყვეტილებას, მან მარიხუანას მხოლოდ და მხოლოდ მოხმარების ლეგალიზება მოახდინა. უკანონო შეძენა-შენახვის შემთხვევაში სასჯელი კვლავ მოქმედებს. თუ ეს არის 5 გრამამდე გამხმარი და 10 გრამამდე ნედლი მარიხუანა, გათვალისწინებულია ადმინისტრაციული ჯარიმა 500 ლარის ოდენობით.
თუ საუბარია დიდი ოდენობით მარიხუანაზე, ამ შემთხვევაში სისხლის სამართლის საქმე აღიძრება. ამასთან საპატიმრო სასჯელი არ გამოიყენება, თუ ადამიანმა 70 გრამამდე მშრალი და 100 გრამამდე ნედლი მარიხუანა შეიძინა ან შეინახა.
საქართველოში ნარკოტიკების, მათ შორის, მარიხუანის რეალიზაცია ისევ ერთ-ერთ მძიმე დანაშაულად რჩება.
