თბილისი, 27 ოქტომბერი — Sputnik. C ჰეპატიტის აღმოფხვრის პროექტი არა მხოლოდ საქართველოსთვის და რეგიონისთვის, არამედ მთელი მსოფლიოსთვის სანიმუშო პროექტია, განაცხადა საქართველოს ჯანმრთელობისა და სოციალური დაცვის მინისტრმა დავით სერგეენკომ მთავრობის სხდომის დასრულების შემდეგ.
ბოლო მონაცემებით, საქართველოში С ჰეპატიტით დაავადებულთა რიცხვი 150 000 ადამიანს აღწევს. С ჰეპატიტის მკურნალობა სახელმწიფო პროგრამით უკვე 30 ათასმა პაციენტმა დაასრულა. მინისტრის თქმით, მრავალი ქვეყანა აპირებს ისწავლოს, როგორ უნდა ებრძოლოს ამ დაავადებას.
„მედიკამენტის კომპონენტი არის უფასო. არც მთავრობა და არც პაციენტები ამაში თანხას არ იხდიან. მეორე კომპონენტის, დიაგნოსტიკის თანხებს უზრუნველყოფს სახელმწიფო. შარშან, როდესაც წლევანდელ ბიუჯეტს ვგეგმავდით, გათვლები გავაკეთეთ სისტემის მაქსიმალურ გამტარუნარიანობაზე, რომელიც გავთვალეთ თვეში 2500 პაციენტზე და ბიუჯეტიც, შესაბამისად, ასე დაიგეგმა“, — განაცხადა სერგეენკომ.
მინისტრმა მოუწოდა საქართველოს ყველა მოქალაქეს, ჩაიტაროს კლინიკური კვლევა C ჰეპატიტზე. მან ასევე პირობა დადო, რომ თუ პაციენტების ნაკადი გაიზრდება, აღნიშნულ პროგრამაზე ბიუჯეტიც გაიზრდება.
საქართველოს მთავრობა С ჰეპატიტის უფასო მკურნალობის პროგრამას 2016 წლიდან ახორციელებს. ამისათვის მთავრობამ ამერიკულ კომპანია Gilead Sciences–თან 10–წლიანი ხელშეკრულება გააფორმა, რომლის თანახმად, ის ქვეყანას С ჰეპატიტის მკურნალობისთვის აუცილებელი მედიკამენტებით ამარაგებს.
პროგრამის ბენეფიციარები პრეპარატ „სოვალდით" არიან უზრუნველყოფილი.
ჰეპატიტის უფასო სკრინინგ-ცენტრები საქართველოს ყველა რეგიონსა და მსხვილ ქალაქშია განთავსებული.
