რჩევები, რომელთაც ქვემოთ შემოგთავაზებთ, სამი გოგონას მამის დაკვირვების ნაყოფია, რომლისთვისაც სახელად „წესები კაცებისთვის, რომლებსაც გოგონები ჰყავთ“ უწოდებიათ.
დიახ, ეს არის წესები ნამდვილი მამებისთვის. წაიკითხეთ, გაიაზრეთ და, თუ გნებავთ, თავადაც დაამატეთ რამე.
• მნიშვნელოვანია ყველაფერი, რასაც გეუბნება უფროსი ქალიშვილი. მნიშვნელოვანია ყველაფერი, რასაც გეუბნება შუათანა ქალიშვილი. მნიშვნელოვანია ყველაფერი, რასაც გეუბნება უმცროსი ქალიშვილი — მაშინაც კი, თუ ეს უაზრო ტიტინია. გამონახე დრო და ბოლომდე მოუსმინე ქალიშვილებს.
• ყველა გოგონა ლამაზია. მიდი და, თუ მაგარი ხარ, არ გაუმეორო ეს მათ დღეში უთვალავმილიონჯერ.
• შენ მამა ხარ. ნუ შეუცვლი ქალიშვილებს დედას. შენ შენი ფუნქციები გაქვს.
• საერთოდ დაივიწყე მათთან ხმის აწევა. ნუ დააპროგრამებ მომავალ „სტერვას“. თუ მაინც აფეთქდი, მერე აუცილებლად მოუხადე ბოდიში — მშობლებიც ადამიანები არიან.
• არ არსებობს ცოტა ან ბევრი სათამაშო. თუ ახლის ყიდვას გთხოვს, ორი ძველი სათამაშოს გაჩუქება შესთავაზე.
• ყველა გოგონა პრინცესაა. ოჰ, გეამათ?! დაივიწყე სიამოვნება. ეძებე მუხუდოს მარცვალი და აღზარდე შენი ქალიშვილი პრინცესასავით. ეს უმძიმესი და ურთულესი სამუშაოა.
• თუ უფროსი ქალიშვილი გირეკავთ, ნუ ფიქრობ, რომ მაინც და მაინც ფული უნდა გთხოვოთ. იქნებ, უბრალოდ, უფროსქალიშვილობა მოსწყინდა?
• ჩახუტება ძალიან მნიშვნელოვანია. ის პატარაა (მიუხედავად იმისა, რომ უკვე 22 წლისაა), გარშემო კი უამრავი დიდი და საშიში რამეებია, რისგანაც მას დედიკოც კი ვერ დაიცავს. შენი ქალიშვილის სინაზე და სიყვარული — ეს გალაქტიკური მასშტაბის ენით აღუწერელი ფასეულობაა.
• ყველგან თან მოგდევს, სადაც მიდიხარ — გარაჟშიც და თოვლის გადასახვეტადაც? მიეცი ორიოდე ჭანჭიკი და ქანჩი, ან პატარა ნიჩაბი და დარწმუნდები, რომ უფრო თავგამოდებული და დაუღლელი დამხმარის პოვნა შეუძლებელია.
• შექმენი ტრადიცია: დაკეტე გარაჟის კარი (ან გაფცქვენი კარტოფილი, ან დაივარცხნე თმები აბაზანის შემდეგ) მხოლოდ ქალიშვილთან ერთად. თანაც ყოველთვის… ან თითქმის ყოველთვის. ეს ძალიან მნიშვნელოვანი ერთობლივი საქმიანობაა.
• გოგონამ უნდა იცოდეს, რომ მამა ყოველთვის დაიცავს. იქნება ეს საბავშვო ბაღში ჯგუფელ ბიჭუნასთან გამართული „ხელჩართული ბრძოლა“, თუ ქალაქის მეორე ბოლოში მდებარე საშიში უბნიდან შინ წაყვანის თხოვნა. გარჩევები — მერე. მთავარია დაცვა!!!
• მოგბეზრდა არეულობა ოთახში? გადახედე ზემოთა წესს პრინცესის შესახებ, გარდაქმენი გოგონა კონკიად და ერთად შეუდექით წესრიგის დამყარებას — ოღონდ შენ მინიმალურად ჩაერიე.
• ნუ დაიკაპიწებ ხელებს სტომატოლოგებისა თუ ლაბორატორიის ექთნების გასალახად. გახსოვდეს, რომ მათ შენი ქალიშვილისთვის სიკეთე სურთ. აუხსენი ეს შენს პრინცესებს. ქალის ცხოვრებაში ბევრი მნიშვნელოვანი ექიმი არსებობს — იმაზე ბევრად მეტი, ვიდრე მამაკაცის ცხოვრებაში.
• ყველა გოგოს აქვს უფლება, გავიდეს საზოგადოებაში მხოლოდ მამასთან ერთად — წავიდეს თუნდაც ცირკში… შენ რომ ცირკს ვერ იტან, ეს არავის აინტერესებს.
• დედა არასდროს ცდება. ცდებით თქვენ ორივე, ან ყველა ერთად. „ჩვენ“ — ეს ძალიან მნიშვნელოვანია!
• გიყვარს სამსახურის მერე დივანზე გორაობა და ფეხბურთის ყურება? მაშინ „შესვი“ შენი გოგონები ფეხბურთზე. წარმოდგენა არ გაქვს, რა საოცარია ქალი-გულშემატკივარი გვერდით. თანაც, მეორე ტელევიზორის ყიდვაც აღარ მოგიწევს.
• ყველა გოგონას აქვს ტირილის უფლება — ისე, უმიზეზოდ ტირილისა და მერე შენ გამოსასვლელ პერანგზე ცრემლებისგან აზელილი კოსმეტიკის შეწმენდისა. თუ გოგონა შენთან სატირლად არ მორბის, ესე იგი, რაღაც ისე ვერ არის. ისტერიკისთვის ცალკე კუთხე გამოყავით და ასეც დაარქვით: „საწუწუნო კუთხე“. იცოდეთ, რომ არავის უყვარს სპეციალურ ადგილზე ისტერიკის მოწყობა. ეს ფაქტია.
• შეთხზე საკუთარი მრავალსერიანი ზღაპარი, გამოიგონე გმირები და დაიმახსოვრე ის მთელი ცხოვრება.
• შენი გოგონა უთხელესი ბროლისგან არ არის დამზადებული. მასაც აქვს ბატუტზე ხტომის, გაყინულ ტბაში ბანაობისა თუ მუხლების გადაყვლეფის უფლება.
• ჩამოაყალიბეთ „საკუთარი“ წესები. მაგალითად, გზაზე ქალიშვილი მხოლოდ მამასთან ხელჩაკიდებული უნდა გადავიდეს, რათა „მამა არსად გაიქცეს და თანაც ყველამ დაინახოს, რა ლამაზი გოგო ჰყავს მამას“; ან „ნამცხვარი გემრიელი არ გამოვა, თუ ოჯახის პატარა წევრები ღუმელს მიეკარებიან“; ან „მამლაყინწა სხვადასხვაფრად იმიტომ უნდა გავაფერადოთ, რომ ჩვენ ასე გადავწყვიტეთ“.
• ყველაზე ფასეული — ეს მცდელობაა. თუ გოგონა ჯერ კიდევ ვერ ხატავს კარგად, მაგრამ ცდილობს, აუცილებლად შეაქე სწორედ მცდელობის გამო. პატივისცემით (და არა პირფერულად) დაანახე, როგორ უნდა იმოძრაოს ზრდის ვექტორზე. პირფერობა და ტყუილი ერთი და იგივეა.
• „ეს მინდა ჩავიცვა, ეგ კი არა!“ ჰოდა, ჩაიცვას, თუ, რა თქმა უნდა, ამინდი ამის საშუალებას იძლევა.
• კაცებო, ნუ შეეცდებით გაიგოთ, რანაირად ახერხებს 4 წლის გოგონა თავისით გაერკვეს თხუთმეტი „პოდიუბკისა“ და ექვსი ტოპ-მოსასხამ-პელერინისგან შემდგარ სამოსში. ერთხელ ვცადე დახმარება, მაგრამ მივხვდი, რომ გოგონების ინსტიქტების წინააღმდეგ ვერ წახვალ. აი, შესაკრავების ამბავში კი შეგიძლიათ დაეხმაროთ. ეს ჩაცმის პროცესს აჩქარებს. თანაც, პრინცესაც კმაყოფილი დაგრჩებათ — იმიტომ რომ უვლით და ზრუნავთ მასზე.
• არასდროს გათქვა საიდუმლო, რომელსაც ქალიშვილი გაგიზიარებს, მაშინაც კი, თუ პრინცესა თავად მოსდებს ამ ამბავს ქვეყანას.
• ვინ გითხრა, რომ ყვავილები მხოლოდ მეუღლეს უნდა აჩუქო?
თავის მხრივ, „Sputnik-საქართველო“ სახალისო ვიდეოს გთავაზობთ, რომელშიც გოგონების მამიკოები ასრულებენ ცეკვას ბალეტ „გედების ტბიდან“:
