თბილისი, 21 აგვისტო – Sputnik. იმ პირთა ქმედებებს, რომლებიც გიორგი შაქარაშვილის გარდაცვალების საქმეზე მთავარი მოწმის რიგით მეხუთე ჩვენების გასაჯაროების უკან დგანან, სათანადო სამართლებრივი შეფასება მიეცემა, განუცხადა ჟურნალისტებს პროკურორმა დავით ყაზარაშვილმა.
პროკურორის თქმით, ამჟამად ამ პირთა ვინაობა დგინდება.
რადიო „თავისუფლების“ ვებ-გვერდზე 19 აგვისტოს გამოქვეყნდა გიორგი შაქარაშვილის გარდაცვალების საქმის მთავარი მოწმის გურამ ამირხანაშვილის ჩვენების ერთ-ერთი ოქმი.
ამირხანაშვილი ამ ჩვენებაში ამბობს, რომ მორაგბე არჩილ გაგნიძემ, რომელიც ერთ-ერთია, ვისაც ბრალი ედება შაქარაშვილის მკვლელობაში, დანარჩენ თანმხლებ პირებს მიუთითა, ის (ამირხანაშვილი) მანქანაში ჩაესვათ და თბილისში წაეყვანათ.
ამირხანაშვილი იხსენებს ასევე Toyota Camry-ში მსხდომთა დიალოგის დეტალებს. მისი სიტყვებით, არჩილ გაგნიძემ მას ჰკითხა, ისევე კარგად იცოდნენ თუ არა ცურვა, როგორც სირბილი.
მანამდე გაგნიძე დაინტერესდა, საიდან იცოდა გიორგი შაქარაშვილმა ასე კარგად სირბილი, რაზეც გურამ ამირხანაშვილმა უპასუხა, რომ ის და გიორგი ბავშვობიდან ფეხბურთს თამაშობდნენ.
ამირხანაშვილმა გაიხსენა ასევე, რომ იმ მომენტისთვის, როდესაც ის Toyota-ს მგზავრებმა იპოვეს, იგი მდევრებს ბუჩქებში 7-8 წუთის განმავლობაში ემალებოდა.
„ჩვენი მიზანია მოწმეებმა, რომლებიც გამოძიების მსვლელობისას დაიკითხებიან, არ იცოდნენ გამოძიების ვერსიების და სხვა მოწმეთა ჩვენებების შესახებ. ეს გამოძიებას ხელს უშლის. ეს ადამიანები შემდეგ უკვე მომზადებული პოზიციებით მოდიან. ეს არ არის ჩვენს ინტერესებში და ადვოკატების გაფრთხილება (გაუთქმელობის შესახებ) სწორედ ამ მიზანს ემსახურებოდა“, – განაცხადა პროკურორმა.
ყაზარაშვილის თქმით, ამირხანაშვილის მეხუთე ჩვენებას არ დაუმძიმებია ბრალი Toyota Camry-ში მსხდომი ხუთი ადამიანის მიმართ.
„ჩვენ ვფიქრობთ, რომ ეს ჩვენებები არ ეწინააღმდეგება საქმის მასალებს. როდესაც მოწმე იკითხება, ის სასამართლოს უხსნის, რა გახდა ჩვენებების შემცველი ინფორმაციის მიზეზი. მხოლოდ ჩვენებები ვერ იქნება ბრალის შემსუბუქების და განაჩენის გამოტანის საფუძველი. ამგვარად, ბრალდება არ დამძიმებულა მხოლოდ გურამ ამირხანაშვილის ჩვენებების საფუძველზე, ეს მოხდა მტკიცებულებების ერთობლიობის ხარჯზე, რომლებიც გამოძიების დროს იქნა მოპოვებული“, – აღნიშნა ყაზარაშვილმა.
შაქარაშვილის საქმე სამ ნაწილად იყოფა: ჩხუბის ეპიზოდები მცხეთის აგარაკზე, ჩხუბის ეპიზოდები მცხეთა–თბილისის ტრასაზე და უშუალოდ ახალგაზრდის მკვლელობა. სულ საქმეზე 17 ადამიანია დაკავებული.
სასამართლო შაქარაშვილის საქმის არსებით განხილვას იწყებს>>
17 დაკავებულიდან მკვლელობის ბრალდება ხუთ მათგანს აქვს წაყენებული, მათგან ორი არასრულწლოვანია. გამოძიების მტკიცებით, მათ ჯერ სცემეს შაქარაშვილი, შემდეგ კი ის მდინარეში გადააგდეს, სადაც ეს უკანასკნელი დაიხრჩო. ფეხბურთელის ცხედარი ოთხდღიანი ძებნის შემდეგ მდინარე არაგვში, მცხეთასთან ახლოს იპოვეს.
