თბილისი, 3 ივლისი – Sputnik. ვალუტის გადამცვლელი პუნქტის თანამშრომელმა მოსკოვში 41 მლნ რუბლი (დაახლოებით 648 ათასი აშშ დოლარი) გაიტაცა და მიიმალა, იუწყება მოსკოვის პოლიციის პრეს-სამსახური.
გავრცელებული ინფორმაციით, მოსკოვის ცენტრში მდებარე ხუთსართულიანი შენობის პირველ სართულზე განთავსებულ ვალუტის გადამცვლელ პუნქტში ერთ-ერთი ფირმის დირექტორი მივიდა ინკასატორებთან ერთად და 41 მლნ რუბლის აშშ დოლარზე გადაცვლა მოითხოვა. მოლარე ქალმა ფული გადათვალა და განაცხადა, რომ ადგილზე საკმარისი თანხა არ იყო. შემდეგ კი მოსულებს სთხოვა, რომ პუნქტიდან გასულიყვნენ და ქუჩაში დალოდებოდნენ, სანამ ხელმძღვანელები შეკვეთილ თანხას მოიტანდნენ.
პოლიციის ცნობით, ფირმის დირექტორი და მისი თანმხლები პირები ორი საათის განმავლობაში ელოდებოდნენ თანხის მოტანას. ბოლოს პუნქტში შესვლა გადაწყვიტეს, მაგრამ კარი დაკეტილი აღმოჩნდა, ხოლო ზარსა თუ კაკუნს არავინ ეპასუხებოდა. დირექტორმა შენობას შემოუარა და აღმოაჩინა, რომ გადამცვლელი პუნქტის უკანა ფანჯარა ღია იყო, ხოლო ოფისი — ცარიელი.
პოლიციამ სისხლის სამართლის საქმე თაღლითობის მუხლით აღძრა და დამნაშავეზე ძებნა გამოაცხადა.
