თბილისი, 22 სექტემბერი — Sputnik. ადიგენის რაიონში ღაღვის ტყე იწვის, რომელიც სოფელ დერცელიდან ათ კილომეტრში მდებარეობს, განუცხადა „Sputnik — საქართველოს" ადიგენის რაიონული ადმინისტრაციის პრეს-სამსახურის წარმომადგენელმა.
მისი სიტყვებით, ხანძარი 21 სექტემბერს, დაახლოებით 20:00 საათზე გაჩნდა. „მთელი ღამე ტრაქტორი მუშაობდა, რაღა მეხანძრეებისთვის გზა გაეჭრა, მთიანი რელიეფი, რა თქმა უნდა, მუშაობას ართულებს. ხანძარი, ჯერჯერობით, ლიკვიდირებული არ არის. რამდენიმე თვე არ გაწვიმებულა, გვალვაა და ვფიქრობ, ამის შედეგია ეს", — აღნიშნა მან.
მოსახლეობას საშიშროება არ ემუქრება, ირწმუნებიან რაიონულ ადმინისტრაციაში და აღნიშნავენ, რომ ადგილზე შესაბამისი ტექნიკაა მობილიზებული.
ხანძარს ებრძვიან თუშეთშიც. ცეცხლის ჩაქრობას ცდილობენ სოფელ ჰეღოში, იუწყება ტელეკომპანია Rustavi2. ადგილობრივების განცხადებით, ცეცხლი საძოვრებს გაუჩნდა. ეს თუშეთში გაჩენილი ხანძრის მესამე შემთხვევაა. სოფელ ხახაბოში ხანძრის ჩაქრობას ორი კვირის განმავლობაში ებრძოდნენ.
ხანძრების სერია საქართველოს 2017 წლის ზაფხულში მოედო. ტყის ხანძრები განსაკუთრებით აგვისტოში გახშირდა. ყველაზე დიდი ხანძარი ბორჯომის ხეობაში, სოფელ დაბის ტყეში გაჩნდა. წინასწარი მონაცემებით, დამწვარია ასობით ჰექტარი უნიკალური ტყე.