თბილისი, 20 იანვარი — Sputnik. შეიარაღებული ყაჩაღური თავდასხმის ბრალდებით ქართველმა პოლიციელებმა დასავლეთ საქართველოში ორი მამაკაცი დააკავეს. იუწყება შინაგან საქმეთა სამინისტროს პრეს-სამსახური.
ერთი ეჭვმიტანილი დააკავეს ფოთში, ხოლო მეორე — ბათუმში.
გამოძიების მონაცემებით, მიმდინარე წლის 3 იანვარს ბრალდებულები იარაღის მუქარით თავს დაესხნენ შპს „იალჩინ მარკეტის“ ბუღალტერს და აღნიშნული ორგანიზაციის კუთვნილი 148 546 ლარი, ასევე პირადი თანხა და ნივთები გაიტაცეს.
სამართალდამცველებმა ერთ-ერთის საცხოვრებელი სახლის ჩხრეკისას 4 700 ლარი, ცივი იარაღი და ნიღაბი, ხოლო მეორის დროებითი საცხოვრებელი სახლიდან 7 750 ლარი და ოქროს საყურე ამოიღეს. საგამოძიებო მოქმედებების შედეგად ასევე ამოღებულია 37 300 ლარი.
გამოძიება დიდი ოდენობით ნივთის დაუფლების მიზნით ჯგუფურად ჩადენილი ყაჩაღობის ფაქტზე მიმდინარეობს, რაც 6-დან 12 წლამდე პატიმრობით ისჯება.
