თბილისი, 18 აპრილი — Sputnik. საქართველოს, აზერბაიჯანისა და ყაზახეთის კომპანიებმა ბაქოში ხელი მოაწერეს შეთანხმებას სატრანსპორტო კონსორციუმის შექმნის შესახებ ჩინეთიდან ევროპაში ტვირთების ტრანსპორტირებისი მიზნით.
კონსორციუმში გაერთიანდნენ შპს ADY Express და შპს ACSC Logistics (აზერბაიჯანი), სს KTZ Express (ყაზახეთი) და სს „საქართველოს რკინიგზის“ შვილობილი კომპანია – შპს Trans Caucasus Terminals (საქართველო), იუწყება შპს Tran s Caucasus Terminals.
შეხვედრაზე მიიღეს გადაწყვეტილება სამეთვალყურეო საბჭოს შექმნის შესახებ, რომელშიც შევიდნენ წარმომადგენლები კონსორციუმის წევრებისგან. საბჭოს თავმჯდომარედ არჩეულია „აზერბაიჯანის რკინიგზის“ თავმჯდომარის მოადგილე იგბალ ჰუსეინოვი.
მხარეებმა მიიღეს გადაწყვეტილება მაისში ამ მარშრუტით ტვირთების გადაზიდვის გრაფიკის დამტკიცების შესახებ.
ტრანსკასპიური საერთაშორისო სატრანსპორტო მარშრუტის მონაწილეები უზრუნველყოფენ ტვირთების გადაზიდვას ჩინეთის პორტებიდან ბათუმში, იქიდან კი თურქეთსა და ევროპაში, განაცხადა ყაზახეთის ვიცე-პრემიერმა ბაკიტჯან საგინტაევმა.
ტრანსკასპიური საერთაშორისო სატრანსპორტო მარშრუტი გადის ჩინეთიდან ყაზახეთზე, აზერბაიჯანზე, საქართველოზე, თურქეთსა და შემდეგ ევროპაში.
