ბოჭორიშვილი: ევროკავშირში არ არის მზაობა „ერთი ხელის მოსმით" გააუქმოს უვიზო მიმოსვლა

© photo: Sputnik / Stringer მაკა ბოჭორიშვილი
 მაკა ბოჭორიშვილი - Sputnik საქართველო, 1920, 21.10.2025
გამოწერა
როგორც მინისტრმა აღნიშნა, თუ საქართველოს წინააღმდეგ ასეთი ინსტრუმენტის გამოყენებას დაიწყებენ, ეს გახდება საშიში პოლიტიკური პრეცენდენტი სხვებისთვისაც.
თბილისი, 21 ოქტომბერი — Sputnik. ევროკავშირში არ არის მზაობა, რომ უვიზო რეჟიმის გაუქმების საკითხი საქართველოზე პოლიტიკური ზეწოლის ინსტრუმენტად გამოიყენონ, შანტაჟის ნებისმიერი მცდელობა კი უსაფუძვლოა, განაცხადა საქართველოს საგარეო საქმეთა მინისტრმა მაკა ბოჭორიშვილმა.
გუშინ, ევროკავშირის საგარეო საქმეთა მინისტრთა საბჭოს სხდომის შემდეგ ევროკავშირის უმაღლესმა წარმომადგენელმა კაია კალასმა განაცხადა, რომ მიმდინარე წლის ბოლომდე წარმოადგენს წინადადებების პაკეტს, მათ შორის საქართველოსთვის უვიზო რეჟიმის შეჩერების მექანიზმის ჩათვლით. მან ასევე აღნიშნა, რომ ამ ეტაპზე კონკრეტული ზომების მიღება ვერ მოხერხდა ევროკავშირის წევრი-ქვეყნების სრული მხარდაჭერის არქონის გამო.
„კიდევ ერთხელ ვნახეთ თუ როგორ ცდილობენ გარკვეული შანტაჟის ენა გამოიყენონ საქართველოსთან დაკავშირებით და მოახდინონ უვიზო მიმოსვლის პოლიტიკის ინსტრუმენტალიზაცია საქართველოსთან მიმართებაში", - განაცხადა ბოჭორიშვილმა ტელეკომპანია „რუსთავი 2"-ის ეთერში.
მისი თქმით, სინამდვილეში, ყველამ ნათლად დაინახა, რომ უვიზო რეჟიმის გაუქმების შესახებ მუქარა და ამით შანტაჟი სრულიად უსაფუძვლოა.
„შეუძლებელია ამ გზით სიარული საქართველოსთან და ზოგადად, ყველასთან მიმართებით", - აღნიშნა ბოჭორიშვილმა.
როგორც მინისტრმა აღნიშნა, თუ საქართველოს წინააღმდეგ ასეთი ინსტრუმენტის გამოყენებას დაიწყებენ, ეს გახდება საშიში პოლიტიკური პრეცენდენტი სხვებისთვისაც.
„ცხადად გამოჩნდა, რომ ევროკავშირში არ არის მზაობა იმისა, რომ ერთი ხელის მოსმით, უვიზო მიმოსვლა იქცეს პოლიტიკის კეთების ინსტრუმენტად. თუმცა, ჩვენ ვხედავთ, რომ გარკვეული გზების ძიება კვლავ გრძელდება, რათა გარკვეულწილად ამ საკითხის ზეწოლის მექანიზმად გამოყენება მოხდეს", - განაცხადა ბოჭორიშვილმა.
საქართველო და ევროკავშირი
ამჟამად საქართველო ევროკავშირის წევრობის კანდიდატი ქვეყანაა. ეს სტატუსი ქვეყანამ 2023 წლის დეკემბერში მიიღო. კანდიდატის სტატუსის მიღებამდე ქვეყანამ ევროკავშირთან ასოცირების შესახებ შეთანხმებას მოაწერა ხელი - საქართველოს მოქალაქეებისთვის უვიზო რეჟიმი 2017 წელს ამოქმედდა.
კანდიდატის სტატუსთან ერთად, საქართველომ მიიღო ცხრა ახალი პირობა, რომელიც ქვეყანამ უნდა შეასრულოს გაწევრიანების თაობაზე მოლაპარაკებების დასაწყებად. მათ შორისაა პოლარიზაციის დაძლევა, დეოლიგარქიზაცია, თავისუფალი და კონკურენტული არჩევნების უზრუნველყოფა და სხვა.
2024 წელს „უცხოური გავლენის გამჭვირვალობის შესახებ" და „ოჯახური ღირებულებებისა და არასრულწლოვანთა დაცვის შესახებ“ კანონების მიღების საპასუხოდ, ევროკავშირმა შეაჩერა საქართველოში მაღალი დონის ვიზიტები და ყველა მაღალი დონის შეხვედრა საქართველოს ხელისუფლების წარმომადგენლებთან ბრიუსელში, ასევე შეაჩერა ფინანსური დახმარება და ქვეყნის ევროინტეგრაცია, იმ მიზეზით, რომ ქვეყანამ მოლაპარაკებების დასაწყებად პირობები არ შეასრულა.
ამ გადაწყვეტილებების შემდეგ, 2024 წლის 28 ნოემბერს, საქართველოს ხელისუფლებამ ქვეყნის ევროკავშირში გაწევრიანებაზე მოლაპარაკებების დაწყების 2028 წლამდე დღის წესრიგიდან ამოღების შესახებ განაცხადა.
ამის პასუხად დასავლეთმა საქართველოს ხელისუფლება დემოკრატიის გზიდან გადახვევაში დაადანაშაულა და მოუწოდა „ევროკავშირის გზაზე დაუყოვნებლად დაბრუნებისკენ“, მიმდინარე წლის 27 იანვარს კი ქართული დიპლომატიური და სამსახურებრივი პასპორტების მფლობელებისთვის უვიზო რეჟიმი შეაჩერა.
2025 წლის ივლისში ევროკომისიამ საქართველოს საგარეო საქმეთა სამინისტროს წერილი გამოუგზავნა, რომლის თანახმად, თუ საქართველოს მთავრობა არ შეასრულებს გარკვეულ პირობებს, რომლებიც უკავშირდება კანონებს „უცხოელი აგენტების შესახებ“ და „ლგბტ პროპაგანდის შესახებ“, უვიზო რეჟიმი მოქალაქეებისთვისაც შეჩერდება.
ყველა ახალი ამბავი
0