შსს: ქართველმა პოლიციელებმა აშშ-ში ექვსი მედალი მოიპოვეს

© photo: Sputnik / The First Channel შსს-ის შენობა
შსს-ის შენობა - Sputnik საქართველო, 1920, 06.07.2025
გამოწერა
„მსოფლიოს პოლიციელთა და მეხანძრეთა თამაშები" 1985 წლიდან მსოფლიოს სხვადასხვა ქალაქში ორ წელიწადში ერთხელ იმართება.
თბილისი, 6 ივლისი - Sputnik. საქართველოს შინაგან საქმეთა სამინისტროს თანამშრომლებმა აშშ-ის ქალაქ ბირმინგემში ჩატარებულ „მსოფლიოს პოლიციელთა და მეხანძრეთა თამაშები 2025"-ზე 4 ოქროსა და 2 ვერცხლის მედლები მოიპოვეს, ნათქვამია უწყების მიერ გავრცელებულ ინფორმაციაში.
მსოფლიოს პოლიციელთა და მეხანძრეთა საერთაშორისო ტურნირზე საპატრულო პოლიციის დეპარტამენტის სამცხე-ჯავახეთის მთავარი სამმართველოს უფროსმა კობა კობახიძემ ძალისმიერ წოლჭიმში საპრიზო პირველი ადგილი დაიკავა და ოქროს მედალი მოიპოვა.
სპორტის ამავე სახეობაში, ასევე ოქროს მედალს დაეუფლა საპატრულო პოლიციის დეპარტამენტის თანამშრომელი ლევან გილიგაშვილიც.
გარდა ამისა, შსს-ის ლოჯისტიკის დეპარტამენტის სამმართველოს უფროსმა ადამურ არქანიამ მკლავჭიდში 2 ოქროს მედალი მოიპოვა.
რაც შეეხება საერთაშორისო შეჯიბრების კიდევ ორ მონაწილეს, მცხეთა-მთიანეთის პოლიციის დეპარტამენტის დირექტორ თეიმურაზ კალანდაძესა და ობიექტების დაცვის დეპარტამენტის თანამშრომელ ილია ჯადუგიშვილს, მათ ძალისმიერ წოლჭიმში ვერცხლის მედლები მოიპოვეს.
„მსოფლიოს პოლიციელთა და მეხანძრეთა თამაშები" 1985 წლიდან მსოფლიოს სხვადასხვა ქალაქში ორ წელიწადში ერთხელ იმართება. მიმდინარე წელს საერთაშორისო ტურნირი ქალაქ ბირმინგემში ჩატარდა, რომელშიც 70 ქვეყნის 8,5 ათასი სპორტსმენი, სპორტის 60 სხვადასხვა სახეობაში მონაწილეობდა.
ყველა ახალი ამბავი
0