დიდი ოდენობით „კოკაინი", „ექსტაზი" და „ჰეროინი" - ბათუმში ბელარუსის მოქალაქეები დააკავეს

© photo: Sputnik / Sergey Vinyavsky / გადასვლა მედიაბანკშიკოკაინი
კოკაინი - Sputnik საქართველო, 1920, 06.07.2025
გამოწერა
დაკავებულებს 20 წლამდე ან უვადო პატიმრობა ემუქრებათ
თბილისი, 6 ივლისი - Sputnik. პოლიციამ ბათუმში განსაკუთრებით დიდი ოდენობით ნარკოტიკული საშუალებები – 3 კგ-მდე „კოკაინი”, 13 ათასამდე „ექსტაზის” აბი და განსაკუთრებით დიდი ოდენობით ნარკოტიკული საშუალება „ჰეროინი“ ამოიღო, განაცხადა შინაგან საქმეთა მინისტრის მოადგილე ალექსანდრე დარახველიძემ დღევანდელ ბრიფინგზე.
სამართალდამცველებმა განსაკუთრებით დიდი ოდენობით ნარკოტიკული საშუალებების უკანონო შეძენა-შენახვისა და ნარკოდანაშაულში დახმარების ფაქტებზე ბელარუსის 25 და 21 წლის ორი მოქალაქე დააკავეს.
დარახველიძის განცხადებით, აღნიშნული ნარკოტიკული საშუალებების რეალიზაცია, სავარაუდოდ, ბათუმში არსებულ სხვადასხვა ღამის კლუბში იგეგმებოდა.
სამართალდამცველებმა ნარკოტიკული საშუალებები ბათუმში, ერთ-ერთი ბრალდებულის მიერ დაქირავებული საცხოვრებელი ბინის ჩხრეკის შედეგად ამოიღეს. გარდა ამისა, პირადი ჩხრეკის შედეგად ასევე ამოღებულია 7 ცალ ბურთულაში მოთავსებული „კოკაინი“, „ექსტაზი“ და ნარკოტიკული საშუალებების დაფასოებისთვის საჭირო სხვა ნივთები. ამასთან, ერთ-ერთი ბრალდებულის მობილურ ტელეფონში აღმოჩენილია ნარკოტიკული საშუალებების რეალიზაციასთვის შერჩეული კონკრეტული ლოკაციების ფოტოსურათებიც.
გამოძიება სსკ-ის 260-ე და 18-260-ე ტერცია მუხლებით მიმდინარეობს. დანაშაული 20 წლამდე ან უვადო თავისუფლების აღკვეთას ითვალისწინებს.
შინაგან საქმეთა სამინისტრო აქტიურად აგრძელებს შესაბამის კომპლექსურ საგამოძიებო მოქმედებებს აღნიშნული ნარკოდანაშაულის ფაქტთან შესაძლო კავშირში მყოფი სხვა პირების დადგენისა და სისხლის სამართლის პასუხისგებაში მიცემის მიზნით.
ყველა ახალი ამბავი
0