დანაშაული საქართველოში: 2024 წლის სტატისტიკა

© photo: Sputnik / Stringerხელბორკილი
ხელბორკილი - Sputnik საქართველო, 1920, 02.02.2025
გამოწერა
საქართველოში დიდი ხნის მანძილზე პირველად დაფიქსირდა ისეთი დანაშაულებები, როგორიცაა უკანონო აბორტები, ბავშვის შეცვლა, სახელმწიფო ჯილდოების ყიდვა/გაყიდვა
თბილისი, 2 თებერვალი — Sputnik. 2024 წელს საქართველოში ჩადენილი დანაშაულების რაოდენობა, 2023 წელთან შედარებით, 7,75%-ით შემცირდა და დაახლოებით 50 ათასი შეადგინა, ნათქვამია შინაგან საქმეთა სამინისტროს მიერ გავრცელებულ განცხადებაში.
2024 წლის 1-ელი იანვრიდან 31 დეკემბრის ჩათვლით პერიოდში ჩადენილი 49.476 დანაშაულიდან საქმეების 64,26% გახსნილია. 2023 წელს გახსნილი საქმეების მაჩვენებელი იყო 64,87%.
გახსნილი საქმეების ძირითადი ნაწილი მოდის ისეთ დანაშაულებზე, როგორიცაა მკვლელობა, მძევლად აყვანა, იძულება, მუქარა, კრიმინალური სამყაროს წევრობა, მისი მხარდაჭერა და დაფინანსება და ნარკოტიკებთან დაკავშირებული დანაშაულებები.
შსს-ის მასალების თანახმად, 2024 წელს, წინა წელთან შედარებით, ქვეყანაში მნიშვნელოვნად გაიზარდა ისეთი დანაშაულებები, როგორიცაა სიცოცხლის ხელყოფა ან გაუფრთხილებლობით სხეულის მძიმე დაზიანება, პირადი მიმოწერის, ტელეფონით საუბრის ან სხვაგვარი ხერხით შეტყობინების საიდუმლოების დარღვევა და „ქურდული სამყაროს“ წევრობა.
საქართველოში დიდი ხნის მანძილზე პირველად დაფიქსირდა ისეთი დანაშაულებები, როგორიცაა უკანონო აბორტები, ბავშვის შეცვლა, სახელმწიფო ჯილდოების ყიდვა/გაყიდვა, განსაკუთრებული ისტორიული, კულტურული, მეცნიერული ან ეროვნული ღირებულების ნივთის ან დოკუმენტის მართლსაწინააღმდეგოდ დაუფლება.
2024 წელს ჩადენილი დანაშაულების ტოპ-5:
ქურდობა – 13.530 დანაშაული
ნარკოტიკებთან დაკავშირებული დანაშაული – 5.375 დანაშაული
მუქარა – 4.132 დანაშაული
ოჯახური ძალადობა – 3.731 დანაშაული
ძალადობა – 3 170 დანაშაული.
გარდა ამისა, 2024 წელს 65 სისხლის სამართლის საქმე აღიძრა მუხლით: „განზრახ მკვლელობა“ და „განზრახ მკვლელობა დამამძიმებელ გარემოებებში“, 189 -„გაუპატიურების“, 1.112 - „თვითმკვლელობამდე მიყვანის“, 7 - „ადამიანით ვაჭრობის“, 3 - „წამების" და 17 - „არაადამიანური მოპყრობის" მუხლებით.
ყველა ახალი ამბავი
0