საქართველოში მაღალხარჯიანი რეანიმაციული შემთხვევების დაფინანსების გაზრდა იგეგმება

© AP Photo / Alessandra Tarantinoპაციენტი კლინიკაში
პაციენტი კლინიკაში - Sputnik საქართველო, 1920, 26.08.2024
გამოწერა
პროგრამის საპილოტე ეტაპზე ინიციატივა ფილტვების შეშუპებისა და სუნთქვის უკმარისობის მართვას შეეხება, რაც რეანიმაციული შემთხვევების უმრავლესობას წარმოადგენს.
თბილისი, 26 აგვისტო - Sputnik. საქართველოს ჯანდაცვის მინისტრმა მიხეილ სარჯველაძემ სექტორის წარმომადგენლებთან რეანიმაციული შემთხვევების დაფინანსებაში დაგეგმილი ცვლილებები განიხილა. ამის შესახებ ინფორმაციას საქართველოს ჯანდაცვის სამინისტრო ავრცელებს.
უწყების ცნობით, სამინისტროს ახალი ინიციატივით, დაგეგმილია მაღალხარჯიანი რეანიმაციული შემთხვევების დაფინანსების ზრდა. კერძოდ, პროგრამის საპილოტე ეტაპზე ინიციატივა ფილტვების შეშუპებისა და სუნთქვის უკმარისობის მართვას შეეხება, რაც რეანიმაციული შემთხვევების უმრავლესობას წარმოადგენს.
სარჯველაძემ სამედიცინო დაწესებულებების ხელმძღვანელებსა და რეანიმატოლოგებთან გამართულ შეხვედრაზე ასევე განიხილა ინიციატივა, რომლის მიხედვითაც, რეანიმაციაში ხანგრძლივი დაყოვნების მაღალხარჯიანი შემთხვევები, გამონაკლისის სახით, საწოლდღის მიხედვით დაფინანსდება. გარდა ამისა, იგეგმება რეანიმაციის შემდგომ სამედიცინო დაწესებულებებში პაციენტის გახანგრძლივებული მოვლისთვის სპეციალური განყოფილების შექმნაც.
უწყების ცნობით, აღნიშნული ინიციატივები საერთაშორისო გამოცდილებას ითვალისწინებს.
როგორც მინისტრმა აღნიშნა, დაგეგმილი სიახლეების მიზანი DRG (Diagnostic Related Group) დაფინანსების მოდელის სრულყოფაა, უშუალოდ ეს ცვლილებები კი დადებითად იმოქმედებს პაციენტების ინტერესებისა და უფლებების დაცვაზე, ასევე კლინიკების ეფექტურად საქმიანობაზე.
ქუთაისში გამართულ შეხვედრაზე DRG-ის ქვეყანაში იმპლემენტაცია წარმატებულ რეფორმად შეაფასა ჯანდაცვის მსოფლიო ორგანიზაციის საქართველოს წარმომადგენლობის ხელმძღვანელმა სილვიუ დომენტემ. მისი განცხადებით, ამით მოქალაქეების ფინანსური დაცულობა და ჯანდაცვისა თუ ჰოსპიტალურ სექტორზე ხელმისაწვდომობა გაიზარდა, თუმცა მნიშვნელოვანია DRG-ის სისტემის მუდმივი მონიტორინგი და განახლება.
სამედიცინო მომსახურების გაუმჯობესების მიზნით, საქართველოს ჯანდაცვის სამინისტრომ 2022 წლის 1 ნოემბრიდან შემოიღო კლინიკების დაფინანსების ახალი სისტემა, რომლის მიხედვითაც იანგარიშება მკურნალობის საბაზისო ტარიფები. საუბარია საერთაშორისო სისტემაზე DRG (Diagnostic Related Group).
სამინისტროს ცნობით, DRG-ის ამოქმედების შედეგად სრულად იფარება პაციენტის კვება, ასევე გაუქმდა მანამდე არსებული 500 და1000-ლარიანი ფრანჩიზები.
რეფორმის პირველ ეტაპზე დაფინანსების DRG მოდელი გადაუდებელ და გეგმურ სტაციონარულ მომსახურებაზე, ინფექციური დაავადებების მართვაზე, მაღალი რისკის ორსულთა, მშობიარეთა და მელოგინეთა მკურნალობაზე ვრცელდებოდა.
2023 წლის ნოემბრიდან კი დაფინანსების არნიშნულ მოდელს საკეისრო კვეთისა და მშობიარობის მომსახურებები დაემატა. კერძოდ, ამ ორი სერვისის ტარიფი გათანაბრდა და1222 ლარით განისაზღვრა. DRG სისტემით უკვე დაფინანსდა 3500-ზე მეტი მშობიარობა.
DRG რეფორმის ფარგლებში, წესდება სამართლიანი ტარიფებიც, კერძოდ, ამ მიზნით, ფასები გადაიხედა და ტარიფები განახლდა 88 DRG კოდზე.
სამინისტროს ინფორმაციით, რეფორმის მიზანი მოსახლეობისთვის ხარისხიანი სამედიცინო მომსახურების მაქსიმალური ხელმისაწვდომობა, პაციენტის თანაგადახდის შემცირება, ჯანდაცვის სისტემაში ეფექტურობისა და გამჭვირვალობის მიღწევაა.
რა არის DRG?
DRG–სისტემა (Diagnostic Related Group) ინგლისურიდან ითარგმნება როგორც „დიაგნოსტიკურად დაკავშირებული ჯგუფები". ესაა სტაციონარული სამედიცინო მომსახურების ფასწარმოქმნის სისტემა, რომელიც მკურნალობის ცალკეული შემთხვევისთვის გარკვეულ, ფიქსირებულ თანხაში გამოიხატება.
თუ აქამდე საქართველოში არსებული კლინიკები, ვთქვათ, აპენდიციტის ოპერაციისთვის სხვადასხვა ფასს სთავაზობდნენ პაციენტებს, ახალი სისტემის დანერგვის შემდეგ აღნიშნული ოპერაციის საფასური ყველა საავადმყოფოში ერთნაირი ხდება. ჯანდაცვის სამინისტრო ახალი სისტემის დანერგვას მკაცრად გააკონტროლებს და კლინიკებს არ ექნებათ პაციენტებისთვის დამატებითი თანხების მოთხოვნის მოტივაცია.
ყველა ახალი ამბავი
0