„ისლამური სახელმწიფოს“ მხარდაჭერისთვის დაკავებულებს ბრალი წარუდგინეს

© photo: Sputnik / Stringerდაკავება
დაკავება - Sputnik საქართველო, 1920, 18.05.2023
გამოწერა
დადგინდა, რომ ბრალდებულები აქტიურად ცდილობდნენ ტერორისტულ საქმიანობაში სხვა პირების ჩართვას.
თბილისი, 18 მაისი – Sputnik. ტერორისტული ორგანიზაცია „ისლამურ სახელმწიფოსთან“ ურთიერთობის საქმეზე შვიდ პირს ბრალდება სისხლის სამართლის კოდექსის ორი მუხლით წარედგინა, მათ შორის ამ ორგანიზაციის წევრობაზე, ნათქვამია საქართველოს პროკურატურის განცხადებაში.
უწყების ინფორმაციით, ბრალი წარდგენილია უცხო ქვეყნის ტერორისტულ ორგანიზაციაში გაერთიანებისა და ტერორისტულ საქმიანობაში დახმარების, ცეცხლსასროლი იარაღის, საბრძოლო მასალის და ასაფეთქებელი მოწყობილობების მართლსაწინააღმდეგო შეძენა-შენახვის ფაქტებზე.
ჩატარებული გამოძიების შედეგად დადგინდა, რომ უცხო ქვეყნის და საქართველოს მოქალაქეები ტერორისტულ ორგანიზაცია „ისლამურ სახელმწიფოში“ გაწევრიანდნენ და მისი ერთ-ერთი ლიდერის მეთაურობით სხვადასხვა ქვეყნებში ტერორისტულ აქტივობებს გეგმავდნენ.
ასევე დადგინდა, რომ ბრალდებულები ტერორისტულ საქმიანობაში სხვა პირების ჩართვას აქტიურად ცდილობდნენ.
ჩატარებული საგამოძიებო მოქმედებების შედეგად, სხვადასხვა მტკიცებულებებთან ერთად, მოპოვებული და ამოღებულია ტერორისტული ორგანიზაციის სიმბოლიკა, ელექტრონული ინფორმაცია, ცეცხლსასროლი იარაღი, საბრძოლო მასალა და ასაფეთქებელი მოწყობილობები.
„ისლამური სახელმწიფოს“ მხარდაჭერისთვის საქართველოს მოქალაქეები დააკავეს >>
მანამდე სუსი იუწყებოდა, რომ ბრალდებულებს შორის ერთი პირი უცხოელია, დანარჩენები კი საქართველოს მოქალაქეები არიან.
პროკურატურამ შვიდივე ბრალდებულის მიმართ აღკვეთის ღონისძიების სახით პატიმრობის შეფარდების თაობაზე თბილისის საქალაქო სასამართლოს უკვე მიმართა. სისხლის სამართლის საქმეზე გამოძიება გრძელდება.
ყველა ახალი ამბავი
0