ყურადღება, განგაშია! საელჩო ისრაელში მცხოვრებ საქართველოს მოქალაქეებს აფრთხილებს

© photo: Sputnik / Alexey Kudenko / გადასვლა მედიაბანკშიისრაელის დროშა
ისრაელის დროშა - Sputnik საქართველო, 1920, 11.05.2023
გამოწერა
თბილისი, 11 მაისი — Sputnik. ისრაელში საქართველოს საელჩო ქვეყანაში მცხოვრებ თანამემამულეებს ქვეყანაში საომარი ოპერაციის დაწყების თაობაზე აფრთხილებს და მოუწოდებს, განგაშის სიგნალის ამოქმედების შემთხვევაში უსაფრთხოების წესები დაიცვან.
9 მაისის ღამეს ისრაელმა ღაზის სექტორში „ისლამური ჯიჰადის" მებრძოლებისა და მისი გასამხედროებული ინფრასტრუქტურის ლიკვიდაციის მიზნით სამხედრო ოპერაცია „ფარი და ისარი“ დაიწყო. ლიკვიდირებულია რადიკალური დაჯგუფების სამი მეთაური. საპასუხოდ „ისლამური ჯიჰადის" ბოევიკებმა ისრაელის სამხრეთ რეგიონის ქალაქების მიმართულებით ათობით რაკეტა გაუშვეს. ღაზის საზღვრის მახლობლად მდებარე ქალაქებსა და დასახლებებში სარაკეტო თავდასხმის მაუწყებელი სიგნალებია ჩართული.
საქართველოს საელჩო თანამემამულეებს მოუწოდებს:
იმ შემთხვევაში, თუ განგაშის სიგნალი იმ მომენტში ჩაირთვება, როდესაც შენობაში იმყოფებით, უნდა შეხვიდეთ სპეციალურ დაცულ სივრცეში/თავშესაფარში, დაკეტეთ კარ-ფანჯრები;
შენობის გარეთ ყოფნისას – იმ შემთხვევაში, თუ ახლოს არ მდებარეობს სპეციალური თავშესაფარი ან არ არის არცერთი შენობა, დაწექით და თავზე დაიფარეთ ხელები;
თუ ავტომობილში იმყოფებით, გააჩერეთ, გადმოდით ავტომობილიდან და შედით უახლოეს შენობაში ან თავშესაფარში. თუ თქვენთან ახლოს შენობა ან თავშესაფარი არ მდებარეობს, გადმოდით მანქანიდან, დაწექით და თავზე დაიფარეთ ხელები.
უწყების განცხადებით, დაუშვებელია შენობის შესასვლელსა და სადარბაზოებში მოქალაქეების გაჩერება. სხვა ინსტრუქციის არარსებობის შემთხვევაში კი განგაშის სიგნალის დასრულებიდან 10 წუთის შემდეგ შესაძლებელია შენობის დატოვება.
„დაუშვებელია ჩამოგდებულ რაკეტასთან ან სხვა ობიექტთან მიახლოება. ასეთ შემთხვევაში მოუწოდეთ მოქალაქეებს, არ მიუახლოვდნენ ობიექტს/ჩამოგდებულ რაკეტას და აცნობეთ პოლიციას", – ნათქვამია განცხადებაში.
გავრცელებული ინფორმაციით, სამხედრო ოპერაციის შედეგად დაიღუპა 21 და დაშავდა 60-ზე მეტი ადამიანი. ისრაელში აცხადებენ, რომ ღაზის სექტორიდან ისრაელის მიმართულებით 400 რაკეტა გაუშვეს. 3 რაკეტა დასახლებულ რაიონებში ჩავარდა. რაკეტების დიდი ნაწილი ისრაელის თავდაცვის სისტემებმა გაანეიტრალა.
ყველა ახალი ამბავი
0