2023 წელს სასოფლო-სამეურნეო კოოპერატივების მხარდაჭერა გაგრძელდება

© photo: Sputnik / Stringerქედა
ქედა - Sputnik საქართველო, 1920, 03.02.2023
გამოწერა
მიმდინარე წელს სასოფლო-სამეურნეო ტექნიკის თანადაფინანსების პროგრამისთვის 17 მლნ ლარია გათვალისწინებული.
თბილისი, 3 თებერვალი — Sputnik. სასოფლო-სამეურნეო კოოპერატივების ინფრასტრუქტურის განვითარებისთვის მიზნობრივი პროექტების ბიუჯეტი იზრდება და 5 მლნ ლარს შეადგენს, ნათქვამია საქართველოს მთავრობის ადმინისტრაციის პრეს-სამსახურის მიერ გავრცელებულ განცხადებაში.
სოფლის მეურნეობის დარგში 2023 წელს განსახორციელებელ გეგმებსა და ძირითად მიმართულებებთან დაკავშირებული საკითხები განიხილეს საქართველოს პრემიერ-მინისტრმა ირაკლი ღარიბაშვილმა და გარემოს დაცვისა და სოფლის მეურნეობის მინისტრმა ოთარ შამუგიამ სამუშაო შეხვედრაზე.
პრეს-სამსახურის ცნობით, სახელმწიფოს მხარდაჭერით 2022 წელს შეიქმნა ცხრა სასოფლო-სამეურნეო კოოპერატივი, რომლებმაც 100-ზე მეტი მცირე ფერმერი გააერთიანეს. სახელმწიფოს თანადაფინანსება 4 მილიონ ლარს აჭარბებს.
საქართველოში ფერმერებს საერთო ჯამში 1 მლრდ ლარზე მეტი ოდენობის სესხებს მისცემენ>>>
სასოფლო-სამეურნეო კოოპერატივებს აქვთ შესაძლებლობა, მონაწილეობა მიიღონ სოფლის განვითარების სააგენტოს მიერ ამოქმედებულ ყველა მიმდინარე პროგრამაში, სადაც, სხვა იურიდიულ პირებთან შედარებით, მათ აქვთ დამატებითი უპირატესობა სახელმწიფო თანადაფინანსების 10%-ის ოდენობით.
გარდა ამისა, სპეციალური კოოპერატიული პროგრამების ფარგლებში სახელმწიფო თანადაფინანსება განსაზღვრულია 70-80%-ის ფარგლებში.
უწყების ცნობით, 2023 წელს სასოფლო-სამეურნეო ტექნიკის თანადაფინანსების პროგრამისთვის ჯამურად 17 მლნ ლარია გათვალისწინებული.
აღსანიშნავია, რომ პრემიერის ინიციატივით 2022 წელს სახელმწიფომ აღნიშნულ პროგრამაზე 50 მლნ ლარი გამოყო, ხოლო ცალკე სასოფლო-სამეურნეო ტექნიკის შესაძენად გაცემულია 66 მლნ ლარის თანადაფინანსება.
სახელმწიფოს მიერ განხორციელებული საგრანტო პროგრამების ფარგლებში დაფინანსებულია 4,8 ათასზე მეტი ერთეული სასოფლო-სამეურნეო ტექნიკის (გამწევი, მისაბმელი, მოსავლის ამღები და კომბაინი) შეძენა.
ყველა ახალი ამბავი
0