აუდიტის სამსახური შეისწავლის, კანონიერად მიიღო თუ არა ნიკა მელიამ ავტომობილი საჩუქრად

© photo: Sputnik / Stringerნიკა მელია
ნიკა მელია - Sputnik საქართველო, 1920, 24.01.2023
გამოწერა
НовостиTelegram
საქართველოს კანონმდებლობით, დეკლარაციის არასწორად შევსების შემთხვევაში პარტია 5000 ლარით დაჯარიმდება.
თბილისი, 24 იანვარი – Sputnik. სახელმწიფო აუდიტის სამსახური იძიებს, ხომ არ მიუღია უკანონოდ ავტომობილი „ერთიანი ნაციონალური მოძრაობის“ თავმჯდომარეს ნიკა მელიას ქართველი ბიზნესმენი დავით კეზერაშვილისგან.
მელია სკანდალის ცენტრში მოექცა მას შემდეგ, რაც ის საქართველოს თავდაცვის ყოფილი მინისტრისგან დავით კეზერაშვილისგან მანქანის საჩუქრად მიღებაში დაადანაშაულეს. იმავდროულად კეზერაშვილი, რომელსაც ხელისუფლება ოპოზიციის დამფინანსებელ ოლიგარქს უწოდებს, მხარს უჭერს მელიას კონკურენტს ლევან ხაბეიშვილს. „ნაციონალური მოძრაობის“ თავმჯდომარის მოახლოებულ არჩევნებში მთავარი კონკურენტები მელია და ხაბეიშვილი არიან.

„სახელმწიფო აუდიტის სამსახურის პოლიტიკური ფინანსების მონიტორინგის დეპარტამენტმა დაიწყო საკითხის მოკვლევა. სამართალდარღვევის ფაქტის გამოვლენის შემთხვევაში მოხდება შესაბამისი სამართლებრივი რეაგირება“, – განაცხადეს უწყებაში.

ამასთან, მელია ამბობს, რომ მხოლოდ რამდენიმე თვის განმავლობაში სარგებლობდა ამ ავტომობილით, რომელიც კეზერაშვილმა პარტიას გადასცა, თუმცა ამის შესახებ არ უთხოვია.
მანამდე მმართველი პარტიის თავმჯდომარემ ირაკლი კობახიძემ განაცხადა, რომ მანქანის გადაცემა პარტიისთვის უკანონო შემოწირულობას წარმოადგენს.
„რაც შეეხება ავტომობილის საკითხს, თავისთავად ეს არის სკანდალური თემა, გამომდინარე იქიდან, რომ კიდევ ერთხელ გამომჟღავნდა „შავი ფულის" ტრიალი ქართულ პოლიტიკაში. ეს არის, რა თქმა უნდა, არალეგალური პარტიული დაფინანსება, რაც ისჯება საკმაოდ მკაცრად ჩვენი კანონმდებლობის მიხედვით“, – განაცხადა ირაკლი კობახიძემ.
საქართველოს კანონმდებლობით, პარტია ვალდებულია მიუთითოს დეკლარაციაში მთელი თავისი ქონება, მათ შორის შემოწირულობები და საჩუქრები.
დეკლარაციის არასწორად შევსების შემთხვევაში პარტია დაჯარიმდება 5000 ლარით, შემოწირულობის დამალვის შემთხვევაში ის გადაეცემა სახელმწიფოს, ხოლო ჯარიმა შემოწირულობის ორმაგი ოდენობისა იქნება.
ყველა ახალი ამბავი
0