საქართველოში საგზაო მოძრაობის წესები მკაცრდება და ახალი ჯარიმები წესდება

© photo: Sputnik / Stringerმანქანები თბილისში, ბარათაშვილის ხიდთან სანაპიროზე
მანქანები თბილისში, ბარათაშვილის ხიდთან სანაპიროზე - Sputnik საქართველო, 1920, 24.07.2022
გამოწერა
Yandex newsTelegram
ყველა ახალი ჯარიმა მართვის მოწმობაზე მინიჭებული ქულების შემცირებასაც გამოიწვევს
თბილისი, 24 ოვლისი – Sputnik. შსს-მ „ადმინისტრაციულ სამართალდარღვევათა კოდექსში“ ცვლილების შეტანის შესახებ“ და „საგზაო მოძრაობის შესახებ“ საქართველოს კანონში ცვლილების შეტანის თაობაზე“ კანონპროექტები შეიმუშავა - გათვალისწინებულია ახალი აკრძალვების შემოღება და საგზაო მოძრაობის წესების გამკაცრება.
დასჯადი ხდება ჩამოწერის შედეგად აღრიცხვიდან მოხსნილი სატრანსპორტო საშუალების მართვა. აღნიშნულისთვის წესდება ჯარიმა 2 000 ლარის ოდენობით და მართვის მოწმობის 30 ქულით შემცირდება.
გარდა ამისა, აიკრძალება ისეთი სატრანსპორტო საშუალების მართვა, რომლის ექსპლუატაციისას წარმოქმნილი ხმაურის დონე აღემატება დადგენილ ნორმატივებს. სანქციის სახედ წესდება ჯარიმა 100 ლარის ოდენობით და მართვის მოწმობაზე მინიჭებული ქულების 10 ქულით შემცირება.
ცვლილებები ასევე დრიფტის აკრძალვას ითვალისწინებს. ამ შემთხვევაში ჯარიმა 300-დან 500 ლარს შეადგენს - დარღვევის სიმძიმიდან გამომდინარე.
გარდა ამისა, შესაბამის უფლებამოსილ ორგანოსთან შეთანხმების და/ან კანონმდებლობით განსაზღვრული სპეციალური აღჭურვილობის და შეფერილობის ავტომანქანით გაცილების გარეშე არაგაბარიტული სატრანსპორტო საშუალებით გზაზე მოძრაობისთვის ჯარიმა 100 ლარიდან 1000 ლარამდე იზრდება. ხოლო თუ აღნიშნულ სამართალდარღვევას მოჰყვა ზიანი, 250 ლარის ნაცვლად, დაწესდება ჯარიმა 2.000 ლარის ოდენობით.
აგრეთვე, სატრანსპორტო საშუალების მძღოლის მიერ მოძრაობის დადგენილი სიჩქარის გადაჭარბება 40 კმ/სთ-ზე მეტი სიჩქარით, 150 ლარის ნაცვლად, გამოიწვევს დაჯარიმებას 300 ლარის ოდენობით.
კანონმდებლობით დადგენილი წესის დარღვევით დამუქებული მინებით სატრანსპორტო საშუალების მართვა, 50 ლარის ნაცვლად, გამოიწვევს დაჯარიმებას 500 ლარის ოდენობით.
გარდა ამისა, განისაზღვრება ადმინისტრაციული სამართალდარღვევის საქმეზე შინაგან საქმეთა სამინისტროს მიერ მიღებული დადგენილების გამოქვეყნების წესი, რომლითაც აღმოიფხვრება ჯარიმის შესახებ დადგენილების ჩაუბარებლობასთან დაკავშირებული პრობლემა.
ქვეყანაში მოქმედებს ქულების სისტემა - მართვის მოწმობაზე დარიცხულია 100 ქულა, რომელიც დარღვევების შესაბამისად მცირდება. ლიმიტის ამოწურვისთანავე მძღოლს მართვის მოწმობა ჩამოერთმევა.
2022 წლის პირველ კვარტალში საგზაო მოძრაობის წესების დარღვევისთვის მართვის უფლებაზე დარიცხული ქულები 74.875-მა მძღოლმა დაკარგა. სრულად ქულები ამოეწურა და მართვის უფლება ჩამოერთვა 6 მძღოლს, ნათქვამია შსს-ს მასალებში.
წყარო - შსს
ყველა ახალი ამბავი
0