მაღალი წნევის დაწევა ხელების მარტივი ვარჯიშებით შეიძლება: მეცნიერები სამ მეთოდს გვირჩევენ
12:12 29.06.2022 (განახლებულია: 10:48 17.08.2023)
© Pixabay / geraldoswald62
გამოწერა
თბილისი, 29 ივნისი — Sputnik. ხელის ძლიერი ჩამორთმევა არა მარტო კარგ პირველ შთაბეჭდილებას ახდენს, არამედ რეალურად ეხმარება ადამიანს ჯანმრთელობის გაუმჯობესებაში, მათ შორის არტერიული წნევის დაწევაში, წერს Daily Record-ი მეცნიერულ კვლევაზე დაყრდნობით.
გამოცემის ინფორმაციით, მეცნიერებმა დაადგინეს, რომ ხელებში ძალის გაზრდამ შეიძლება ისევე იმოქმედოს მაღალი წნევის მკურნალობაზე, როგორც მედიკამენტებმა. სწავლულების თქმით, ხელების ძალისმიერი ვარჯიში ამცირებს არტერიული წნევის მატებასთან დაკავშირებულ საფრთხეებს. ასეთი ვარჯიშები აგრესიულად მოქმედებს, აძლიერებს რა თითების, ხელისგულებისა და მაჯის კუნთებს, თუმცა არ ცვლის მათ ზომას.
კანადის მაკმასტერის უნივერსიტეტის კვლევამ აჩვენა, რომ ხელის მოჭერით ვარჯიშის შედეგად შესამჩნევი ცვლილებები არტერიული წნევის მაჩვენებლებში დაახლოებით ორ თვეში გამოვლინდა.
მკვლევარებმა დაადგინეს, რომ ხელის ვარჯიშები მნიშვნელოვნად ეხმარება სისტოლური არტერიული წნევის შემცირებას. სისხლძარღვების ულტრაბგერითმა გაზომვამ ასევე აჩვენა, რომ ერთ-ერთი მთავარი არტერია ამ ვარჯიშებით უფრო მოქნილი, ასევე ნაკლებად ხისტი გახდა, ეს კი ჯანმრთელი სისხლძარღვების ნიშანია.
იზომეტრიული ვარჯიშები
წნევის დამწევი ვარჯიშების ჩატარება რამდენიმე მეთოდითაა შესაძლებელი. ასეთებია:
ვარჯიში მყარი ობიექტით — ამისათვის შესაფერისია ნებისმიერი მკვრივი სფერო, მილის ნაჭერი, ბურთი ან ნებისმიერი სხვა მაგარი საგანი. დაიჭირეთ ის ხელში და მოუჭირეთ მაქსიმალური ძალის დაახლოებით მესამედით. გააჩერეთ ასეთ მდგომარეობაში დაახლოებით ორი წუთი, შემდეგ ორი წუთი დაისვენეთ და გაიმეორეთ ვარჯიში მეორე ხელით. თითოეული ხელით ვარჯიში ორჯერ უნდა გაკეთდეს.
ვარჯიში თოკით — თქვენ დაგჭირდებათ სქელი და მკვრივი თოკი, დაახლოებით 40 სანტიმეტრი სიგრძისა. გადაზომეთ ორივე ბოლოდან დაახლოებით 10 სანტიმეტრი და გამოსკვენით კვანძი. მოკიდეთ ხელები კვანძებს და გაჭიმეთ თოკი ისე, თითქოს მისი გაწყვეტა გინდათ. გააკეთეთ ეს ვარჯიში ორი წუთის განმავლობაში, შემდეგ ორი წუთი დაისვენეთ და კიდევ ერთხელ გაიმეორეთ თავიდან.
ვარჯიში მილით — ამისთვის დაგჭირდებათ ხის ან უდრეკი მილის ნაჭერი. დაიჭირეთ ის ორივე ხელით და დაატანეთ ძალა, თითქოს მის შუაზე გადატეხას აპირებთ. განაგრძეთ ასე ორი წუთის განმავლობაში, შემდეგ ორი წუთი დაისვენეთ და გაიმეორეთ ვარჯიში.
ვარჯიშისგან მაქსიმალური ეფექტის მისაღებად ვარჯიშებზე თქვენი მაქსიმალური ძალისხმევის 30% მაინც უნდა დახარჯოთ.
გაითვალისწინეთ: სტატიაში მოყვანილი რჩევები საინფორმაციო ხასიათისაა. ნებისმიერი ვარჯიშის დაწყებამდე თუ კვების რაციონში ცვლილებების შეტანამდე კონსულტაცია გაიარეთ ექიმთან!
