წულუკიანი: აქცია ბევრისთვის იმედგაცრუება გახდა

© photo: Sputnikთეა წულუკიანი
თეა წულუკიანი - Sputnik საქართველო, 1920, 21.06.2022
გამოწერა
აქციის ორგანიზატორი – სამოქალაქო მოძრაობა „სირცხვილია" ხელისუფლებას მასობრივ დაუმორჩილებლობას დაჰპირდა, თუ ის მოთხოვნების შესრულებაზე უარს განაცხადებს.
თბილისი, 21 ივნისი — Sputnik. აქციის „შინ ევროპისკენ" ბევრი მონაწილე იმედგაცრუებული დარჩა, რადგან იქ იმისთვის არ წასულა, რომ რევოლუციის მოწყობის გეგმები ესმინა, განაცხადა საქართველოს ვიცე-პრემიერმა, კულტურის მინისტრმა თეა წულუკიანმა ბრიფინგზე.
მრავალათასიანი აქცია გუშინ, 20 ივნისს გაიმართა. აქციაზე გამოცხადდა მანიფესტი სახალხო მოძრაობის შექმნის შესახებ, რომლის მიზანი საქართველოს ევროპული არჩევანის დაცვა იქნება. აქციის ორგანიზატორი – სამოქალაქო მოძრაობა „სირცხვილია" ხელისუფლებას მასობრივ დაუმორჩილებლობას დაჰპირდა, თუ ის მოთხოვნების შესრულებაზე უარს იტყვის.

„ამ ადამიანებიდან არაერთისთვის იყო გარკვეული იმედგაცრუება, რადგან ისინი არ მისულან იქ იმიტომ, რომ მოესმინათ გეგმები გადატრიალების შესახებ, და ისინი არ იყვნენ მოცული იმ მიზნით, რომ აქციაზე მისულიყვნენ რევოლუციის მოთხოვნით", – განაცხადა წულუკიანმა.

მისი თქმით, რუსთაველის გამზირზე ბევრი მივიდა ევროკავშირში ინტეგრაციის მნიშვნელოვნების იდეის მხარდასაჭერად. აქცია ევროკავშირის სამიტის წინ (23-24 ივნისი) გაიმართა, სადაც განიხილავენ საქართველოს, უკრაინისა და მოლდოვისთვის ევროკავშირის წევრობის კანდიდატის სტატუსის მინიჭების საკითხს.
„იქ იყვნენ ადამიანები, ვინც მართლა გულწრფელად ილტვის და მიისწრაფვის იქითკენ, რისკენაც მივისწრაფვით ჩვენ ყველანი და ქართული სახელმწიფო. ეს გახლავთ ევროპულ ოჯახში სრულფასოვანი წევრობა", – განაცხადა წულუკიანმა.
ევროკომისიამ გასულ კვირაში გასცა რეკომენდაცია სტატუსის მინიჭების შესახებ უკრაინისა და მოლდოვისთვის, მაგრამ არა საქართველოსთვის. ევროკომისიამ 12 პირობა დაასახელა და აღნიშნა, რომ მხოლოდ მათი შესრულების შემთხვევაში მიენიჭება საქართველოს ევროკავშირის წევრობის კანდიდატის სტატუსი.
„უსამართლოა" - პრემიერი ევროკომისიის გადაწყვეტილებაზე>>
მმართველი პარტია „ქართული ოცნება - დემოკრატიული საქართველოს" წარმომადგენლები მოძრაობა „სირცხვილიას“ თავიანთი მთავარი ოპონენტის „ნაციონალური მოძრაობის" ახალგაზრდულ ფრთად განიხილავენ.
„ოცნების" ლიდერების განცხადებით, იმ დროს, როდესაც ქვეყანა ევროკომისიის დასკვნას ელოდებოდა, "ნაცმოძრაობა" და მისი მომხრეები ევროპას საქართველოს ხელისუფლების წინააღმდეგ განაწყობდნენ. უფრო მეტიც, მმართველი პარტია „ნაციონალურ მოძრაობას“ უწოდებს ძალას, რომელსაც ქვეყანაში სიტუაციის არევა, მისი ომში ჩაბმა და ამ ტალღაზე ხელისუფლებაში დაბრუნება სურს.
„სირცხვილია" შემდეგ მასშტაბურ აქციას 24 ივნისს გეგმავს, მას შემდეგ, რაც ევროკავშირი საქართველოსთან დაკავშირებით საბოლოო გადაწყვეტილებას გამოაცხადებს. ამ დროს გამოაცხადებენ სახალხო მოძრაობის მოთხოვნებს.
ინიციატივის მიხედვით, სახალხო მოძრაობის ეროვნული საბჭო პარიტეტის პრინციპით შეიქმნება, სადაც სამოქალაქო საზოგადოებას ხმების უმრავლესობა ექნება. სახალხო მოძრაობა გააერთიანებს სამოქალაქო საზოგადოების, არასამთავრობო ორგანიზაციების, პოლიტიკური პარტიების, სტუდენტობის, კულტურის, პროფკავშირების წარმომადგენლებს.
ყველა ახალი ამბავი
0