საუდის არაბეთმა ქართველი მეზღვაურების სერტიფიკატები აღიარა

© photo: Sputnik / Stringerმეზღვაურის დღე ბათუმში
მეზღვაურის დღე ბათუმში - Sputnik საქართველო, 1920, 11.12.2021
გამოწერა
საქართველოს ჰყავს გამოცდილი და კომპეტენტური მეზღვაურები, რომელთა უმრავლესობა ტანკერების მართვაში სპეციალიზდება, განაცხადა სააგენტოს ხელმძღვანელმა
თბილისი, 11 დეკემბერი - Sputnik. საუდის არაბეთმა ქართველი მეზღვაურების სერტიფიკატები აღიარა, იტყობინება საზღვაო ტრანსპორტის ეროვნული სააგენტოს პრესსამსახური.
ლონდონში, საერთაშორისო საზღვაო ორგანიზაციის (IMO) ასამბლეის 32-ე სესიის ფარგლებში საქართველოს დელეგაციამ საზღვაო ტრანსპორტის სააგენტოს უფროსის, თამარ იოსელიანის ხელმძღვანელობით, საუდის არაბეთის სამეფოს ტრანსპორტის მინისტრთან, სალეჰ ალ იასერთან გამართა შეხვედრა, სადაც ქართველი მეზღვაურების სერტიფიკატების აღიარების მემორანდუმს მოეწერა ხელი.
„დღეიდან ქართველი მეზღვაურების სერტიფიკატებს საუდის არაბეთის სამეფოშიც აღიარებენ. ეს მნიშვნელოვანია ჩვენთვის, რადგან საქართველოს ჰყავს გამოცდილი და კომპეტენტური მეზღვაურები, რომელთა დიდი ნაწილი სწორედ ტანკერების მართვაში სპეციალიზდება“, - განაცხადა იოსელიანმა.
საუდის არაბეთის დროშის ქვეშ თანამედროვე სატანკერო ფლოტი ცურავს და, როგორც სააგენტოს ხელმძღვანელი აღნიშნავს, გასათვალისწინებელია ის სამუშაო და სოციალური პირობებიც, რომლებიც ღირსეული დასაქმების შესაძლებლობას მისცემს ქართველ მეზღვაურებს.
„ქართველი მეზღვაურების დასაქმების ხელშესაწყობად ვგეგმავთ მჭიდრო კომუნიკაციას გემთმფლობელ კომპანიებთანაც“, - განაცხადა თამარ იოსელიანმა.
მეზღვაურები - Sputnik საქართველო, 1920, 20.09.2021
ქართველი მეზღვაურები არაბთა გაერთიანებული საამიროების ფლოტში დასაქმებას შეძლებენ
სამუშაო შეხვედრაზე დიდი ყურადღება დაეთმო ბათუმის სახელმწიფო საზღვაო აკადემიასა და საუდის არაბეთის სამეფოს საზღვაო საგანმანათლებლო დაწესებულებებს შორის სამომავლო თანამშრომლობას ერთობლივი სასწავლო პროგრამების მომზადების, სტუდენტების სასწავლო პრაქტიკით უზრუნველყოფისა და გაცვლითი პროგრამების მიმართულებით.
მხარეებმა ასევე განიხილეს საერთაშორისო საზღვაო ორგანიზაციის საქმიანობის ფარგლებში ორი ქვეყნის წარმომადგენლობების თანამშრომლობის შესაძლებლობაც, რომელიც მოიცავს სხვადასხვა კომიტეტებსა და ქვეკომიტეტებში ერთობლივ მუშაობას და სხვა აქტივობებს.
ყველა ახალი ამბავი
0