პროკურატურა: პოლონელი ტურისტის მკვლელობის მცდელობის საქმეზე ბრალდებული შეურაცხადია

© photo: Sputnik / Stringerპროკურატურა
პროკურატურა - Sputnik საქართველო, 1920, 12.08.2021
გამოწერა
პროკურატურის ცნობით, პოლონეთის მოქალაქის მკვლელობის მცდელობაში ბრალდებულს არ შესწევს უნარი, მონაწილეობა მიიღოს საგამოძიებო და სასამართლო მოქმედებებში.
თბილისი, 12 აგვისტო – Sputnik. თბილისის საქალაქო სასამართლომ პროკურატურის შუამდგომლობის საფუძველზე პოლონელი ტურისტის მკვლელობის მცდელობაში ბრალდებულის მიმართ სისხლისსამართლებრივი დევნა შეწყვიტა და ბრალდებულს ფსიქიატრიულ დაწესებულებაში იძულებითი მკურნალობა განუსაზღვრა, ნათქვამია საქართველოს პროკურატურის განცხადებაში. 
პოლონელი ტურისტი, რომელიც თბილისში 5 ივლისს დაჭრეს - Sputnik საქართველო, 1920, 20.07.2021
თბილისში დაჭრილი პოლონელი ტურისტი სამშობლოში დაბრუნდა
გამოძიებით დადგინდა, რომ 2021 წლის 5 ივლისს ბრალდებული თბილისში სრულიად უმიზეზოდ თავს დაესხა საქართველოში ტურისტული ვიზიტით მყოფ პოლონეთის მოქალაქეს და დანით რამდენიმე მძიმე ჭრილობა მიაყენა. დაჭრილ მამაკაცს კლინიკაში მიყვანისთანავე ოპერაცია ჩაუტარდა.
სამართალდამცველებმა ბრალდებული ცხელ კვალზე დააკავეს. მას ბრალი სსკ-ის 19–109-ე მუხლის მეორე ნაწილის „გ“ ქვეპუნქტით (მკვლელობის მცდელობა ხულიგნური ქვენა გრძნობით) წარედგინა.
გამოძიების ვერსიით, დაკავებულს ფსიქიკური პრობლემები ჰქონდა და, შესაბამისად, მისი ჯანმრთელობის მდგომარეობის დადგენის მიზნით გამოძიების ფარგლებში დაინიშნა ფსიქიატრიული ექსპერტიზა. საბოლოოდ დადგინდა, რომ ბრალდებული დაავადებულია ქრონიკული ფსიქიკური ავადმყოფობით, პარანოიდული შიზოფრენიით.
„დანაშაულის ჩადენის დროს მას არ შეეძლო გაეცნობიერებინა თავისი ქმედებები. ფსიქიკური მდგომარეობის გათვალისწინებით, ბრალდებულს არ შესწევს უნარი ანგარიში გაუწიოს თავს, მისცეს ჩვენება და მონაწილეობა მიიღოს საგამოძიებო და სასამართლო მოქმედებებში. ასევე მისი ფსიქიკური მდგომარეობა ხელს უშლის სასჯელის მოხდას, რადგან არსებობს საკუთარი თავის და სხვა პირისთვის ზიანის, მუქარის და ძალადობის შემცველი ქცევის რისკი“, – ნათქვამია პროკურატურის განცხადებაში.
პოლონეთის მოქალაქემ იაცეკ კოლანკევიჩმა, რომელიც ალადაშვილის სახელობის კლინიკაში გადიოდა მკურნალობის კურსს, საქართველო 20 ივლისს დატოვა.
ყველა ახალი ამბავი
0