თბილისი, 30 ივნისი — Sputnik. ვლადიმირ პუტინმა რუსეთის მოქალაქეებთან პირდაპირი ხაზის დროს უპასუხა შეკითხვას, შეუძლია თუ არა ხელისუფლება ვინმეს გადასცეს და ჰყავს თუ არა მემკვიდრე–შემცვლელი.
რუსეთის ლიდერის თქმით, გადაწყვეტილებას იმის თაობაზე, თუ ვინ გახდება პრეზიდენტი, ყოველთვის ქვეყნის მოქალაქეები იღებენ პირდაპირი ფარული არჩევნების გზით.
„რაც შეეხება იმას, თუ ვის შეუძლია ქვეყანას სათავეში ჩაუდგეს. ერთი მხრივ, როგორც იტყვიან, წმინდა ადგილი ცარიელი არ რჩება (свято место пусто не бывает), შეუცვლელი ადამიანები არ არსებობენ, მაგრამ, მეორე მხრივ, ჩემი პასუხისმგებლობა ისიცაა, რომ რეკომენდაცია მივცე პრეზიდენტობის პრეტენდენტ ადამიანებს. რა თქმა უნდა, მოვა დრო, და იმედი მაქვს, რომ შევძლებ ვთქვა, ესა და ეს ადამიანი, ჩემი აზრით, შეძლებს ასეთ შესანიშნავ ქვეყანას უმეთაუროს–მეთქი“, — თქვა პუტინმა.
რუსეთის პრეზიდენტი ქვეყნის მოსახლეობასთან პირდაპირი ხაზით 2001 წლის ბოლოდან ურთიერთობს, რა დროსაც მათ მიერ დასმულ შეკითხვებს პასუხობს. მას შემდეგ ამ ფორმატის ონლაინ-ტრანსლაციები ყოველწლიურად გადაიცემოდა, გარდა 2004 და 2012 წლებისა.
სტატისტიკის თანახმად, რუსეთის სახელმწიფოს მეთაურის სახელზე საშუალოდ რამდენიმე ასეული ათასიდან რამდენიმე მილიონამდე შეკითხვა შედის. პირდაპირი ჩართვების დრო, როგორც წესი, წინასწარ განსაზღვრული არ არის. პირველი ხუთი ასეთი ეთერი დაახლოებით სამი საათის განმავლობაში მიმდინარეობდა, მაგრამ 2007 წლის შემდეგ პროგრამა ყოველთვის სცდებოდა ოთხსაათიან ზღვარს. ყველაზე ხანგრძლივი გამოდგა 2013 წლის პირდაპირი ხაზი, რომელიც 4 საათი და 47 წუთი გრძელდებოდა.
