თბილისი, 21 მაისი – Sputnik. აიცერი და სცადე ბედი – ამერიკულ მერილენდში კორონავირუსის საწინააღმდეგო ვაქცინაციის წამახალისებელი ორიგინალური ხერხი მოიგონეს. შტატის მცხოვრებლებს 40-დან 400 ათას დოლარამდე მოგებას სთავაზობენ ლატარიაში. ამის შესახებ შტატის გუბერნატორმა ლარი ჰოგანმა განაცხადა.
„მერილენდის შტატის მოსახლეობის წასახალისებლად COVID-19-ის საწინააღმდეგო ვაქცინაციაში, მერილენდის ლატარია ყოველდღე, 25 მაისიდან 3 ივნისის ჩათვლით, ერთ ვაქცინირებულ ადამიანს დააჯილდოებს 40 ათასი დოლარით, ხოლო 4 ივლისს (აშშ-ის დამოუკიდებლობის დღე) ფინალური გათამაშება გაიმართება, რომლის დროსაც ერთ-ერთ ვაქცინირებულს 400 ათასი დოლარის ოდენობის პრიზი გადაეცემა“, – ნათქვამია გუბერნატორის ვებ-გვერდზე გამოქვეყნებულ განცხადებაში.
ყველაფერი ასე მოხდება: შტატის ჯანდაცვის დეპარტამენტი 18 წელს ზემოთ თითოეულ აცრილ ადამიანს შემთხვევით ნომერს მიანიჭებს, იღბლიან გამარჯვებულს კი შემდეგ შემთხვევითი ციფრების გენერატორი გამოავლენს.
ვაქცინირებული თანამშრომლები: საქართველოში კომპანიებისთვის შეღავათებს ამზადებენ>>
ეს მოქალაქეების მოტივაციის ამაღლების პირველი შემთხვევა არ არის აშშ-ში, მანამდე ლატარიის დაწყების შესახებ ნიუ-იორკისა და ოჰაიოს შტატების გუბერნატორებმაც განაცხადეს.
