თბილისი, 20 მაისი - Sputnik. საქართველოს მოქალაქეები უნგრეთში ჩასვლას ვაქცინაციის სერტიფიკატით შეძლებენ, განაცხადა უნგრეთის საგარეო საქმეთა მინისტრმა პეტერ სიიარტომ.
უნგრეთმა და საქართველომ აღნიშნულთან დაკავშირებით ორმხრივ შეთანხმებას მიაღწიეს. შეთანხმების თანახმად, უნგრეთის მოქალაქეები საქართველოში ჩამოსვლას ასევე ვაქცინაციის დამადასტურებელი დოკუმენტებით შეძლებენ.
შეთანხმებასთან დაკავშირებით საქართველოში უნგრეთის ელჩი ვიქტორია ჰორვატი აცხადებს, რომ უნგრეთის მთავრობა საქართველოს მიერ გაცემულ ვაქცინაციის სერტიფიკატს „მწვანე ბარათად“ აღიარებს და საქართველოს მოქალაქეები მისი წარდგენის შემთხვევაში უნგრეთში ჩასვლას შეზღუდვების გარეშე შეძლებენ.
აღნიშნული შეთანხმება ძალაში მიმდინარე კვირაში შევა.
აპრილის ბოლოს ცნობილი გახდა, რომ საქართველო კოვიდ-პასპორტზე მუშაობას იწყებს. საქართველოს დაავადებათა კონტროლის ეროვნული ცენტრის ხელმძღვანელის ამირან გამყრელიძის განცხადებით, საქართველოში გაცემული კოვიდ-პასპორტი ევროკავშირში გაცემული დოკუმენტის ანალოგი იქნება.
