თბილისი, 20 მაისი – Sputnik. პარლამენტის კომიტეტების ხელმძღვანელთა განსაზღვრის საკითხი მას შემდეგ წამოიწევა, რაც საკანონმდებლო ორგანოში ყველა ოპოზიციური პარტია შევა, განაცხადა პარტიის „ლელო საქართველოსთვის“ ერთ-ერთმა ლიდერმა ბადრი ჯაფარიძემ.
პარლამენტის ხუთი კომიტეტის თავმჯდომარის პოსტი ოპოზიციონერმა დეპუტატებმა უნდა დაიკავონ. აღნიშნული საკითხი მმართველ პარტია „ქართული ოცნება – დემოკრატიულ საქართველოსა“ და ოპოზიციას შორის კომპრომისული შეთანხმების ნაწილია.
„დოკუმენტში გაწერილია, თუ როგორ უნდა მოხდეს პარლამენტში ძალაუფლების გადანაწილება, მაგრამ ოპოზიციურ ფლანგზე ჩვენ ჯერ არ გვყავს სრული შემადგენლობა“, – განაცხადა ჯაფარიძემ ჟურნალისტებთან.
დღეისათვის პარლამენტში შესვლასთან დაკავშირებით გადაწყვეტილება მხოლოდ „ერთიან ნაციონალურ მოძრაობას“ არ აქვს მიღებული. ამ დროისათვის პარტია შიდა კონსულტაციებს აწარმოებს, რადგანაც აღნიშნულ საკითხზე „ნაცმოძრაობის“ წევრების მოსაზრება გაიყო.
150-კაციან საქართველოს პარლამენტში ქვეყნის ყველაზე დიდ ოპოზიციურ პარტიას 33 მანდატი ეკუთვნის.