თბილისი, 22 აპრილი - Sputnik. ჭყონდიდის ეპარქიის სალხინოს ღვთისმშობლის მიძინების მამათა მონასტრის ტაძარში სასულიერო პირები ერთმანეთს დაუპირისპირდნენ, იუწყება ტელეკომპანია „რუსთავი 2“.
მოგვიანებით სალხინოს ღვთისმშობლის სახელობის ტაძარში სასულიერო პირებს შორის სიტყვიერი დაპირისპირება ფიზიკურ დაპირისპირებაში გადაიზარდა, რის შედეგადაც სასულიერო პირების ნაწილმა მეორე ნაწილს ეკლესია დაატოვებინა.
დაპირისპირება გაგრძელდა ტაძრის ეზოშიც, მაშინ როდესაც ადგილზე გამოჩნდნენ სასულიერო პირები, რომლებიც აცხადებდნენ, რომ ადგილზე მიტროპოლიტ სტეფანეს დავალებით მივიდნენ.
ჭყონდიდის ეპარქიის მიტროპოლიტმა მეუფე სტეფანემ 4 აპრილს ამბოხში მონაწილეობისთვის ეპარქიიდან ოთხი სასულიერო პირი განკვეთა. მათ შორის არიან ის მღვდელმთავრები, რომლებიც მკვეთრად აფიქსირებდნენ თავიანთ პროტესტს და არ ემორჩილებოდნენ მიტროპოლიტ სტეფანეს, რომელმაც ეპარქიაში ყოფილი მიტროპოლიტი პეტრე (ცაავა) ჩაანაცვლა.
მომხდარზე მალევე განცხადება გაავრცელა საქართველოს საპატრიარქომ. საპატრიარქოში აცხადებენ, რომ დაპირისპირება, რასაც უკანასკნელ პერიოდში ჭყონდიდის ეპარქიაში ჰქონდა ადგილი, იმეორებს იმავე პათოსს, რაც ამ ეპარქიის ყოფილი მღვდელმთავრისგან ეპარქიიდან გათავისუფლების შემდეგ მომდინარეობს.
„სასულიერო პირთა ნაწილი დღემდე არ ეგუება სინოდის გადაწყვეტილებას და ეპარქიაში ახალი მმართველის დადგენას, ისინი გამოირჩევიან ამბოხის სულისკვეთებით, ზღვარგადასული, გაუწონასწორებელი ქმედებებითა და, ზოგადად, მოქმედებენ საეკლესიო კანონიკის უხეში დარღვევით“, - ნათქვამია განცხადებაში.
ჭყონდიდის ეპარქიას წლების განმავლობაში პეტრე ცაავა ხელმძღვანელობდა. 2019 წლის 31 ოქტომბერს, მას შემდეგ, რაც პეტრე ცაავამ კათოლიკოს-პატრიარქი ილია მეორე მამათმავლობაში დაადანაშაულა, წმინდა სინოდმა ის მღვდელმთავრობიდან გადააყენა, ჭყონდიდის ეპარქიის მმართველად კი მიტროპოლიტი სტეფანე დანიშნა.
ადგილობრივი სასულიერო პირებისა და მრევლის ნაწილი მიიჩნევს, რომ მეუფე სტეფანე ეპარქიის უკანონო მმართველია. ისინი ითხოვენ, რომ მან ჭყონდიდის ეპარქია დატოვოს, საპატრიარქომ პეტრე ცაავას მიერ წაყენებული ბრალდება გამოიძიოს და მიტროპოლიტად კვლავ ის დააბრუნოს.
