თბილისი, 28 მარტი – Sputnik. „მოძრაობა საქართველოსთვის“ აქტივისტები საქართველო-ესპანეთის მატჩის ყურებას რუსთაველის გამზირზე, პარლამენტის შენობასთან საგანგებოდ დამონტაჟებულ მონიტორზე აპირებენ.
ამგვარად ისინი დაარღვევენ ღამის საათებში გადაადგილების შეზღუდვას - ე.წ. კომენდანტის საათს, რომელიც 21:00 საათიდან 05:00 საათამდე მოქმედებს.
იქიდან გამომდინარე, რომ მხოლოდ ნაწილს შეუძლია მატჩზე დასწრების პრივილეგიით ისარგებლოს და კომენდანტის საათი დაარღვიოს, გადავწყვიტეთ რუსთაველის გამზირიდან პირდაპირი ტრანსლაცია წავიყვანოთ. ჩვენ ვერ დავტოვებთ ტერიტორიას დილის 5 საათამდე, ამიტომ სხვადასხვა ღონისძიებებს მოვაწყობთ, განაცხადა ტელეარხ Formula-ს ეთერში ორგანიზაციის ერთ-ერთმა წარმომადგენელმა.
მსოფლიო-2022-ის შესარჩევი მატჩი საქართველოსა და ესპანეთს შორის დღეს „დინამო-არენაზე“ გაიმართება. შეხვედრა 20:00 საათზე დაიწყება. მაყურებელი „დინამო არენაზე“ საფეხბურთო მატჩს ჯანდაცვის სამინისტროს მიერ დადგენილი რეგულაციების დაცვით დაესწრება. ეპიდემიოლოგიური უსაფრთხოების მიზნით სტადიონზე ტრიბუნების 30% შეივსება.
საქართველო-ესპანეთის მატჩის გამო თბილისში საზოგადოებრივი ტრანსპორტი გვიანობამდე იმუშავებს >>
სტადიონზე მისულ ქომაგებს „კომენდანტის საათის“ დროს გადაადგილების უფლება ექნებათ, მათი ერთგვარი საშვი მატჩის ბილეთი იქნება. გარდა ამისა, მეტრო და ავტობუსები 29 მარტის 01:00 საათამდე იმუშავებს.
