თბილისი, 26 მარტი – Sputnik. დღეს აჭარაში, სხვა რეგიონებისგან განსხვავებით, ეპიდემიოლოგიური ვითარების კუთხით ყველაზე უკეთესი მდგომარეობაა, განაცხადა დაავადებათა კონტროლის ეროვნული ცენტრის ხელმძღვანელმა ამირან გამყრელიძემ.
მისი თქმით, თუ რეგიონის მოსახლეობა მომავალშიც ზედმიწევნით დაიცავს რეკომენდაციებსა და უსაფრთხოების ზომებს, რეგიონში ტურიზმი მალე განახლდება.
„აჭარაში სხვა რეგიონებთან შედარებით უკეთესი მდგომარეობაა. იქ საზოგადოებრივი იმუნიტეტი ყველაზე მაღალია. თუ საზოგადოება ზედმიწევნით დაიცავს რეკომენდაციებსა და უსაფრთხოების ზომებს, პირველ რიგში კი პირბადის ტარებას, შესაძლებელია რეგიონმა ტურისტები მიიღოს“, — განაცხადა ამირან გამყრელიძემ.
ბოლო 24 საათის განმავლობაში აჭარაში კორონავირუსი 26 ადამიანს დაუდასტურდა.
საქართველოში ახალი კორონავირუსით დაავადებულთა რაოდენობა ბოლო დღე-ღამეში 419-ით გაიზარდა და ინფიცირებულთა საერთო რიცხვმა 279.446-ს მიაღწია.
