თბილისი, 18 მარტი - Sputnik. ევროპის წამლის მარეგულირებლის ЕМА-ს რისკების შეფასების ფარმაკოლოგიური ზედამხედველობის კომიტეტმა დაასკვნა, რომ AstraZeneca-ს ვაქცინა უსაფრთხო და ეფექტურია კორონავირუსის წინააღმდეგ, აღნიშნა ამსტერდამში გამართულ პრესკონფერენციაზე ЕМА-ს აღმასრულებელმა დირექტორმა ემერ კუკმა.
„კომიტეტმა გამოიტანა მკაფიო სამეცნიერო დასკვნა, რომ ეს უსაფრთხო და ეფექტური ვაქცინაა, იცავს ადამიანებს COVID-19-სგან“, - აღნიშნა მან.
მისი სიტყვებით, უსაფრთხოების კომიტეტმა ჯერ ვერ გამოავლინა კავშირი გართულებებსა და პრეპარატის ხარისხს შორის. „ამ მომენტისთვის პრეპარატთან გართულებების კავშირის მტკიცებულებები გამოვლენილი არ არის“, - ხაზი გაუსვა მან.
ამასთან, ЕМА-ს ხელმძღვანელმა დასძინა, რომ ამგვარი შესაძლო კავშირის კატეგორიულად გამორიცხვა მაინც არ შეიძლება, ვაქცინის მოქმედების და მისი შესაძლო გვერდითი მოვლენების საფუძვლიანად შესწავლა გაგრძელდება.
ЕМА-ს ფარმაკოლოგიური ზედამხედველობის კომიტეტმა ხუთშაბათს რიგგარეშე სხდომა გამართა, რომელზეც AstraZeneca-ს ვაქცინით აცრილთა შორის თრომბოემბოლიური გართულებების შესახებ ბოლო დროს შეკრებილი და გაანალიზებული მონაცემები შეაფასა.
მიუხედავად AstraZeneca-ს ვაქცინის დადასტურებული უსაფრთხოებისა, ევროკავშირის მარეგულირებელი პრეპარატის აღწერაში მაინც შეიტანს ინფორმაციას თრომბოზების შემთხვევების შესახებ.
