თბილისი, 17 მარტი – Sputnik. ტოკიოში მიმდინარე მარტის ბაშოზე ქართველმა სუმოისტმა ლევან გორგაძემ, იგივე ტოჩინოშინმა ზედიზედ მეორე გამარჯვება იზეიმა და თანაბარი ბალანსი დააფიქსირა.
ლევან გორგაძე დღეს დასავლეთის მე-7 მაეგაშირა კაგაიაკის შეხვდა და მოწინააღმდეგე სუკუინაგეს ილეთით დაამარცხა. ქართველმა სუმოისტმა ჯერ 26 წლის იაპონელის დოჰიოდან გადაყვანა სცადა, საბოლოოდ კი მოგვერდით დააგდო და გაიმარჯვა.
ტოჩინოშინმა მარტის ბაშო ორი მარცხით დაიწყო, რის შემდეგაც მდგომარეობა კოტონოვაგასთან გამარჯვებით გაიუმჯობესა. ქართველის მორიგი მეტოქე ხვალ დასავლეთის მე-5 მაეგაშირა ოკინოუმი იქნება. ურთიერთშეხვედრებში ლევანს იაპონელ ოკინოუმისთან მინიმალური დადებით ბალანსი აქვს. ჩატარებული 17 შეხვედრიდან ქართველი სუმოისტის ანგარიშზე ცხრა გამარჯვება და რვა მარცხია.
