თბილისი, 10 მარტი - Sputnik. „ექსპო ჯორჯიასთან“ საქართველოს რაგბის კავშირის საპრეზიდენტო არჩევნებთან დაკავშირებით აქცია, რომელსაც ირაკლი აბუსერიძის მხარდამჭერები მართავენ, ხმაურის ფონზე მიმდინარეობს.
„ექსპო ჯორჯიაში“ ამ წუთებში საქართველოს რაგბის კავშირის არჩევნები მიმდინარეობს. აღსანიშნავია, რომ კავშირის პრეზიდენტად 30 დეკემბერს ირაკლი აბუსერიძე აირჩიეს, მაგრამ სამოქალაქო რეესტრის სააგენტომ აბუსერიძეს რეგისტრაციაზე უარი განუცხადა, რის მიზეზადაც არჩევნების ჩატარების არასწორი ვადები დაასახელა.
აქციის მონაწილეთა აღშფოთება ამ ეტაპზე ერთადერთი კანდიდატის სოსო ტყემალაძის ადგილზე გამოჩენამ გამოიწვია, რომელიც შენობაში შევიდა. ამის შემდეგ აბუსერიძის მომხრეებმა პოლიციის კორდონი გაარღვიეს და დარბაზში შეჭრას ცდილობდნენ, თუმცა პოლიციამ საბოლოოდ მათი შეკავება შეძლო. ადგილზე იმყოფება საქართველოს ნაკრების ყოფილი მორაგბე და ირაკლი აბუსერიძის მხარდამჭერი სიმონ მაისურაძეც, რომელმაც მედიასაშუალებებთან კომენტარი გააკეთა.
„გარედან მოლით მივაწექით, გვინდოდა ყრილობა ჩაგვეშალა, მაგრამ ისინი მაინც შეიპარნენ და ისე ატარებენ ყრილობას. ყრილობა არალეგიტიმურია, რომელსაც არ ვაღიარებთ. ასეთი გზით რაგბიში მოსვლა დაუშვებელია“, – განაცხადა მაისურაძემ.
დაუზუსტებელი ინფორმაციით, სამართალდამცველებისა და მომიტინგეების დაპირისპირების შედეგად რამდენიმე ადამიანი დაშავდა.
ირაკლი აბუსერიძის მომხრეები უკვე დიდი ხანია აქტიურად გამოთქვამენ პროტესტს რაგბის კავშირის პრეზიდენტის არჩევნებთან დაკავშირებით და ყველანაირად ცდილობენ ხელი შეუშალონ პრეზიდენტად სხვა კანდიდატურის არჩევას. ისინი აცხადებენ, რომ მმართველი პარტია „ქართული ოცნება“ რაგბის კავშირის შიდა საქმეებში ერევა და პრეზიდენტის პოსტზე საკუთარი კანდიდატის არჩევას ცდილობს.
