თბილისი, 1 მარტი – Sputnik. მთავრობის ადმინისტრაციაში საქართველოს პრემიერ-მინისტრის ირაკლი ღარიბაშვილისა და ევროპული საბჭოს პრეზიდენტის შარლ მიშელის პირისპირ შეხვედრა გაიმართა. ინფორმაციას პრემიერ-მინისტრის პრეს-სამსახური ავრცელებს.
ევროპული საბჭოს პრეზიდენტი საქართველოს კვირას ეწვია. ვიზიტის ფარგლებში შარლ მიშელი უკვე შეხვდა საქართველოს პრეზიდენტს სალომე ზურაბიშვილს. ასევე დაგეგმილია შეხვედრები საქართველოს პარლამენტის თავმჯდომარესთან არჩილ თალაკვაძესთან და პოლიტიკური პარტიების ლიდერებთან.
ირაკლი ღარიბაშვილმა ევროპული საბჭოს პრეზიდენტს საქართველოში ვიზიტისთვის მადლობა გადაუხადა და აღნიშნა, რომ ეს ევროკავშირის მხრიდან ძლიერი პარტნიორობის და მხარდაჭერის კიდევ ერთი დადასტურებაა.
საქართველოს მთავრობის მეთაურისა და ევროპული საბჭოს პრეზიდენტის პირისპირ შეხვედრისას საუბარი შეეხო აღმოსავლეთ პარტნიორობის ფორმატის მნიშვნელობას და მომავალი სამიტის ფარგლებში განსახილველ საკითხებს. ასევე ხაზი გაესვა საქართველოს, როგორც ევროკავშირთან ასოცირებული ქვეყნის წარმატებებს.
შეხვედრაზე განხილვის ერთ-ერთი თემა COVID-19 პანდემიის კუთხით საქართველოსა და ევროკავშირში არსებული ვითარება იყო. განსაკუთრებით აღინიშნა კორონავირუსის საწინააღმდეგო ვაქცინაზე ყველა ქვეყნის თანაბარი ხელმისაწვდომობის უზრუნველყოფისა და ვაქცინის სამართლიანი განაწილების მნიშვნელობა.
„პრემიერმა ხაზი გაუსვა საერთაშორისო პარტნიორების მხარდაჭერის გადამწყვეტ როლს, რათა ქვეყანამ ვაქცინაციის პროცესი უახლოეს პერიოდში დაიწყოს, ვინაიდან პანდემიის დამარცხება მხოლოდ ერთობლივი ძალისხმევით არის შესაძლებელი“, – აღნიშნულია პრემიერ-მინისტრის პრეს-სამსახურის ინფორმაციაში.
მანამდე, საქართველოს პრეზიდენტთან შეხვედრისას, შარლ მიშელმა განაცხადა, რომ ჯანდაცვის მსოფლიო ორგანიზაციასთან ერთად იგი ყველაფერს გააკეთებს, რათა საქართველოს მალე ჰქონდეს ვაქცინაზე წვდომა.
ვიზიტის ფარგლებში შარლ მიშელი საქართველოში ევროკავშირის წარმომადგენლობის ახალი ოფისის გახსნას დაესწრება, სადაც ოპოზიციური პარტიების ლიდერებთან გამართავს შეხვედრას.
ევროპული საბჭოს პრეზიდენტი საქართველოს 2 მარტს დატოვებს.
