თბილისი, 15 თებერვალი – Sputnik. გორში მცხოვრებმა ასაკიანმა წყვილმა კორონავირუსი დაამარცხა და კლინიკა დატოვა.
ტელეარხ Imedi-ს ინფორმაციით, 87 წლის ნუნუ შაკიაშვილი პროფესიით ქიმიკოსია, ხოლო მისი მეუღლე, 91 წლის ვალერიან შაკიაშვილი - ინჟინერ-მშენებელი.
ხანდაზმული ცოლ-ქმარი საავადმყოფოში 27 იანვარს გადაიყვანეს. ქალს იშემიური ინსულტი ჰქონდა გადატანილი და გულის უკმარისობა აღენიშნებოდა. მისი მდგომარეობა მძიმე იყო, დაზიანებული ჰქონდა ფილტვის უდიდესი ნაწილი. მაგრამ ექიმებმა მისი და მისი მეუღლის გადარჩენა შეძლეს.
მედპერსონალმა მათ გამოჯანმრთელება მიულოცა და ყვავილები და ტკბილეული გადასცა.
ბოლო 24 საათში ვირუსისგან გამოჯანმრთელდა 639 პირი და ჯამში გამოჯანმრთელებულთა რაოდენობა 258.732-მდე გაიზარდა. საქართველოში ახალი კორონავირუსით დაავადებულთა საერთო რიცხვმა 265.722-ს მიაღწია. გარდაცვლილთა საერთო რაოდენობამ 3.363-ს მიაღწია. საქართველოში კორონავირუსის პირველი შემთხვევა გასული წლის 26 თებერვალს დაფიქსირდა.
