თბილისი, 7 თებერვალი - Sputnik. არსებული რეგულაციის ფარგლებში მოსწავლეებისთვის პირბადის ტარება სავალდებულო არაა, თუმცა ამჟამად მიმდინარეობს მსჯელობა რეგულაციის შეცვლასთან დაკავშირებით, განაცხადა განათლების მინისტრის მოადგილემ, ეკატერინე დგებუაძემ.
უწყებათშორისი საკოორდინაციო საბჭოს გადაწყვეტილებით, 15 თებერვლიდან თბილისში, ქუთაისსა და რუსთავში სასწავლო პროცესი საკლასო ოთახებში განახლდება. მთავრობაში განმარტავენ, რომ პანდემიის გამო დაწესებული შეზღუდვების ვადაზე ადრე შემსუბუქება ქვეყანაში კოვიდ-ინფექციის გავრცელების კლებამ გამოიწვია.
მინისტრის მოადგილის განცხადებით, პირბადის ტარებასთან დაკავშირებით არსებობს ბრძანებით დამტკიცებული რეგულაცია, რომელიც, შესაძლოა, გადაიხედოს.
„სავარაუდოდ, ამასთან დაკავშირებით მომდევნო კვირაში ვიმსჯელებთ და ინფორმაციას მივაწვდით სკოლას, მშობლებსა და საზოგადოებას“, – განაცხადა ეკატერინე დგებუაძემ.
განათლების სამინისტროს ინფორმაციით, ამ ეტაპზე ძალაში რჩება 2020-2021 სასწავლო წლის დასაწყისში სამინისტროს მიერ გაცემული რეკომენდაციები სასწავლო პროცესის ორგანიზებასთან დაკავშირებით.
კერძოდ, სკოლას შეუძლია თავად განსაზღვროს:
- გაკვეთილის ხანგრძლივობა;
- საგაკვეთილო პროცესის დაწყების დრო საფეხურების/კლასების მიხედვით;
- მოქნილად დაგეგმოს ცვლები;
- მოსწავლეების უსაფრთხოებისა და სკოლის ინფრასტრუქტურის გათვალისწინებით დაგეგმოს შერეული სწავლების საკუთარი მოდელი;
- შერეული მოდელის დაგეგმვისას I-IV კლასის მოსწავლეებისთვის სავალდებულოდ განსაზღვროს ფიზიკურად სასკოლო სივრცეში გაკვეთილების ჩატარება.
სკოლა ვალდებულია, დასწრებით სწავლების დაწყებისთანავე უზრუნველყოს ინდივიდუალური ან ჯგუფური მუშაობა იმ მოსწავლეებთან, რომლებიც არ ან ვერ ერთვებოდნენ დისტანციურ სწავლებაში.
გარდა ამისა, სამინისტრო სკოლებს დამატებით შესაძლებლობებსაც სთავაზობს. კერძოდ, მშობლებს კვლავ ეძლევათ შესაძლებლობა, გააკეთოს არჩევანი დასწრებით სწავლებასა და დისტანციური სწავლების ფორმას შორის. აღნიშნული მიდგომა შეეხება მხოლოდ შემდეგ ქალაქებში – თბილისში, ქუთაისში, რუსთავში, ზუგდიდში, თელავში, ზესტაფონში, გარდაბანში, ფოთში, მარნეულში, ბათუმში, ქობულეთში და გორში მდებარე საჯარო სკოლებს.
თუკი მასწავლებლებს მოუწევთ დამატებით ჩაატარონ დისტანციური გაკვეთილები, სამინისტროს გადაწყვეტილებით, ისინი შესაბამის დანამატს მიიღებენ.
რაც შეხება რისკჯგუფში მყოფ მასწავლებლებს, დგებუაძის განცხადებით, მათთან დაკავშირებით სამინისტრომ ორი მიმართულებით იმუშავა.
„თუ ფაქტებით დადასტურდა, რომ მასწავლებელი რისკჯგუფშია, სკოლამ საგანი სხვა მასწავლებლით უნდა ჩაანაცვლოს. ამასთან, მნიშვნელოვანია, მასწავლებლის უფლებაც არ დაირღვეს და ამ შემთხვევაში შესაძლებელია, კონკრეტული საგნის სწავლა დისტანციურ რეჟიმზე გადავიდეს“, – განაცხადა მინისტრის მოადგილემ.
დგებუაძის ინფორმაციით, სამინისტროს შესაბამისი სამმართველოს, ასევე მუნიციპალურ დონეზე არსებული საგანმანათლებლო რესურსცენტრების წარმომადგენლები შემთხვევითობის პრინციპით სკოლებში მივლენ და იქ არსებულ ვითარებას გააკონტროლებენ.
1 თებერვლიდან აჭარის, ზუგდიდის, გორის, ფოთისა და თელავის სკოლებში სასწავლო პროცესი აღდგა. რაც შეეხება თბილისის, რუსთავისა და ქუთაისის სკოლებს, მთავრობის მიერ შემუშავებული გეგმის მიხედვით, აღნიშნულ ქალაქებში სასწავლო პროცესის აღდგენა 1 მარტიდან იყო დაგეგმილი, თუმცა ახლა ეს ორი კვირით უფრო ადრე მოხდება.
