თბილისი, 1 თებერვალი – Sputnik. გუმათჰესის დასახლებაში, ქვემო ნამახვანჰესის საპროექტო ტერიტორიაზე განთავსებულ ENKA-ს საწყობს ცეცხლი გაუჩნდა, ნათქვამია კომპანიის Facebook-გვერდზე გავრცელებულ განცხადებაში.
შემთხვევა დღეს, 04:00 საათზე მოხდა. საწყობში, სადაც ცეცხლი გაჩნდა, კომპანია ENKA-ს საკუთრებაში არსებული ტექნიკა ინახებოდა.
„წინასწარი მონაცემებით, აღმოჩენილია ხანძრის სამი კერა, რომელიც ამ მომენტისთვის ლიკვიდირებულია. საბედნიეროდ, შემთხვევას მსხვერპლი არ მოჰყოლია, თუმცა კომპანიის ზარალი სოლიდურია“, – აღნიშნულია განცხადებაში.
ადგილზე მობილიზებულია ექსპერტ-კრიმინალისტთა ჯგუფი და მიმდინარეობს საგამოძიებო სამუშაოები.
მდინარე რიონზე „ნამახვანჰესის“ მშენებლობასთან დაკავშირებით სოფლების ნამახვანისა და ჟონეთის მოსახლეობა, არასამთავრობო ორგანიზაციები და სასულიერო პირები თითქმის ოთხი თვეა საპროტესტო აქციებს მართავენ. ადგილობრივები მშენებლობის შეჩერებას მოითხოვენ.
წყალტუბოს მუნიციპალიტეტის მერიის წარმომადგენელთა განმარტებით, „ნამახვანჰესის“ მშენებლობა მუნიციპალიტეტის ტერიტორიაზე სახელმწიფოს შესაბამისი ნებართვების საფუძველზე მიმდინარეობს.
„ნამახვანის ჰესების კასკადის“ პროექტი გააერთიანებს ორ ჰესს – „ნამახვანს“ და „ტვიშს“, საერთო 433 მეგავატი დადგმული სიმძლავრით. პროექტის სავარაუდო ღირებულება 730 მილიონ დოლარს შეადგენს.
პროექტს განახორციელებს Clean Energy Georgia Group, რომელმაც შესაბამის ტენდერში გაიმარჯვა. ჰესის ასაშენებლად Clean Energy Georgia Group-მა, რომელიც ნორვეგიული ჯგუფ Clean Energy-ს შვილობილი კომპანიაა, თურქული სამშენებლო ჰოლდინგი ENKA Insaat ve Sanayi A.S მოიზიდა.
