თბილისი, 27 იანვარი — Sputnik. ძველი „ყვითელი ავტობუსების“ ახლით ჩანაცვლების პროცესი მთავრდება, დამატებით შესყიდული გვაქვს 100 ერთეული 12-მეტრიანი ავტობუსი, განაცხადა დედაქალაქის მერმა კახა კალაძემ მუნიციპალიტეტის მთავრობის სხდომაზე.
როგორც კალაძემ აღნიშნა, მერია მომავალში 180 ერთეული 8-მეტრიანი ავტობუსის შეძენასაც გეგმავს. პარალელურად დაწყებულია მიკროავტობუსების ჩანაცვლების პროგრამაც.
„დედაქალაქში აღარ იმოძრავებს ყვითელი ავტობუსები, მოსახლეობას მხოლოდ ახალი 8-, 10- და 12-მეტრიანი ავტობუსები მოემსახურება. თუმცა, ამას სასურველ შედეგამდე მაინც არ მივყავართ. ჩვენ გვსურს, რომ საზოგადოებრივი ტრანსპორტი აუცილებლად იყოს მაქსიმალურად კომფორტული და სწრაფი... გვჭირდება კიდევ ახალი ავტობუსების შეძენა. იგეგმება 180 ერთეული 8-მეტრიანი ავტობუსების შესყიდვა“, – განაცხადა კალაძემ.
დღეისათვის თბილისის ავტოპარკი MAN-ისა და ISUZU-ს მარკის რამდენიმე ასეული ავტობუსითაა შევსებული.
