თბილისი, 11 დეკემბერი – Sputnik. გაეროს გენერალურმა მდივანმა ანტონიუ გუტერეშმა განაცხადა, რომ მსოფლიოს ქვეყნები შეიძლება ბოლო 80 წლის განმავლობაში უძლიერეს ეკონომიკურ ვარდნას გადააწყდნენ, იუწყება РИА Новости.
„პანდემიის სოციალური და ეკონომიკური შედეგები უზარმაზარია და ის კიდევ უფრო ძლიერდება. ვერანაირი ვაქცინა ვერ გამოასწორებს იმ ზარალს, რომელიც უკვე მოგვადგა. ვდგავართ უდიდესი გლობალური რეცესიის წინ ბოლო 80 წელიწადის განმავლობაში“, – განაცხადა გუტერეშმა ნობელის პრემიის ფორუმზე სიტყვით გამოსვლისას.
მისი თქმით, რეაქცია პანდემიაზე იყო „ფრაგმენტული და ქაოტური“, და ახლა პლანეტზე „იზრდება უკიდურესი სიღატაკე, დგება შიმშილის საფრთხე“. მან აღნიშნა, რომ ქვეყნებმა კორონავირუსის გამოწვევის წინაშე გაერთიანება ვერ შეძლეს.
„პანდემია – ესაა კრიზისი, რომელიც არც ერთ სხვა კრიზისს არ ჰგავს. მსოფლიო საერთო მტერს გადააწყდა. სამწუხაროდ, ქვეყნების მთავრობებმა ამ გლობალური საფრთხისთვის ერთობლივი პასუხი არ მიიღეს“, – მიიჩნევს გაეროს ხელმძღვანელი.
უფრო ადრე გაეროს მსოფლიო სასურსათო პროგრამის დირექტორმა დევიდ ბიზლიმ განაცხადა, რომ პანდემიის გამო შიმშილის ზღვრის პირას მყოფი ადამიანების რიცხვი 270 მილიონამდე გაიზარდა.
გაეროს გენმდივანმა G20-ს ღარიბი ქვეყნების ვალების გადახდის გადავადებისკენ მოუწოდა>>
ჯანმოს ბოლო მონაცემებით, კორონავირუსით მთელ მსოფლიოში თითქმის 69 მილიონი ინფიცირებულია, გარდაიცვალა მილიონნახევარზე მეტი ადამიანი.
