თბილისი, 9 დეკემბერი – Sputnik. აჭარის რეგიონში ახალი კორონავირუსით კიდევ ერთი ექიმი გარდაიცვალა – ბათუმის რესპუბლიკური საავადმყოფოს მედპერსონალმა თანამშრომლის გადარჩენა ვერ შეძლო, იუწყება ტელეკომპანია „რუსთავი 2“.
ინფიცირებული ექიმი 6 დეკემბერს კოვიდ-სასტუმროდან სტაციონარში გართულებული ჯანმრთელობის მდგომარეობით გადაიყვანეს. მას გულის თანმდევი დაავადება ჰქონდა. ის ბათუმის რესპუბლიკურ საავადმყოფოში წლების განმავლობაში ტრავმატოლოგად მუშაობდა.
ამ დროისათვის საქართველოში კორონავირუსით ინფიცირებული მედიკოსების საერთო რაოდენობა 8 ათასს აჭარბებს. ბოლო ცნობებით, აჭარაში კორონავირუსს სამედიცინო სფეროს რვა წარმომადგენელი ემსხვერპლა.
ქვეყანაში COVID-19-ის პანდემიის გავრცელებიდან დღემდე გამოვლენილი დადასტურებული შემთხვევების საერთო რაოდენობა 169.649-ს შეადგენს. 2020 წლის 26 თებერვლიდან დღემდე სულ 1.576 ადამიანი გარდაიცვალა.
