თბილისი, 20 ნოემბერი – Sputnik. კორონავირუსის პანდემიის გამო მსოფლიოს ქვეყნების სახელმწიფო ვალი წლის ბოლოსთვის რეკორდულ მაჩვენებლამდე – 277 ტრილიონ დოლარამდე გაიზრდება, ნათქვამია საერთაშორისო ფინანსების ინსტიტუტის (IIF) ანგარიშში.
„მსოფლიო ვალი 2019 წლიდან 15 ტრილიონ დოლარზე მეტით გაიზარდა და 2020 წლის მესამე კვარტალში ახალ რეკორდს – 272 ტრილიონ დოლარზე მეტს მიაღწია. რამდენადაც პანდემიის საპასუხოდ საბიუჯეტო ზომები გრძელდება, ჩვენ ველოდებით, რომ გლობალური ვალი 2020 წლის ბოლოსთვის 277 ტრილიონ დოლარს (მშპ-ის 365%) მიაღწევს“, – ნათქვამია ინსტიტუტის ანგარიშში.
თავის მხრივ, საერთაშორისო სავალუტო ფონდი ასევე მიიჩნევს, რომ პანდემიასთან დაკავშირებით მოსალოდნელია საყოველთაო ეკონომიკური ვარდნა. ორგანიზაცია მიმდინარე წელს მსოფლიო მშპ-ის 4,4%-ით შემცირებას პროგნოზირებს, ხოლო 2021 წელს – 5,2%-ით ზრდას.
საქართველოს სახელმწიფო ვალი
ქვეყანაში ეკონომიკური აქტივობის შემცირებამ, რომელიც გამოწვეულია კორონავირუსის გავრცელების რისკის გამო დაწესებული შეზღუდვებით, და ასევე სახელმწიფოს მხრიდან მოსახლეობის დაზარალებული ნაწილისთვის მასშტაბური დახმარებების აღმოჩენამ ბიუჯეტის დეფიციტის თითქმის 8%-მდე ზრდა გამოიწვია.
წარმოქმნილი დეფიციტის დაფარვის ერთ-ერთი ძირითადი წყარო საერთაშორისო საფინანსო ინსტიტუტების დახმარება გახდა, რამაც, თავის მხრივ, საგარეო ვალის გაზრდა გამოიწვია. მეორე კვარტალში საქართველოს სახელმწიფო ვალი თითქმის 8%-ით გაიზარდა და 30 ივნისისთვის ვალის ოდენობამ 6.142,5 მლნ დოლარს მიაღწია.
მიმდინარე წლის ივნისში 2020 წლის სახელმწიფო ბიუჯეტში შეტანილი ცვლილებების თანახმად, ქვეყნის სახელმწიფო ვალის ზღვრული მოცულობა 4,5 მლრდ-ით გაიზრდება და 27,3 მლრდ ლარს მიაღწევს.
აქედან საგარეო ვალის ზღვრული მოცულობა 21,4 მლრდ ლარი, ხოლო შიდა ვალის – 5,9 მლრდ ლარი იქნება.
წლის შედეგებით, მთავრობის ვალი მშპ-ის 55,7%-ს შეადგენს, ამასთან ამ ვალის 78% საგარეო ვალია. პირველი კვარტლის ბოლოს იგი მშპ-ის 44,1%-ს შეადგენდა.
