თბილისი, 17 ივლისი – Sputnik. აზერბაიჯანის ხელისუფლებამ მკაცრი საკარანტინო რეჟიმის ორი კვირით გაგრძელების გადაწყვეტილება მიიღო. კარანტინის ვადა 20 ივლისს იწურებოდა, იუწყება „Sputnik–აზერბაიჯანი“.
როგორც აზერბაიჯანის მინისტრთა კაბინეტთან არსებული ოპერატიული შტაბის წევრმა შახმარ მოვსუმოვმა ქვეყნის სახელმწიფო ტელევიზიის (AzTV) ეთერში განაცხადა, კარანტინის რეჟიმი დიდი განხილვის შემდეგ, სამწუხაროდ, კიდევ 15 დღით გაგრძელდა, ისინი იძულებული იყვნენ, რომ ასეთი გადაწყვეტილება მიეღოთ.
კარანტინის გამკაცრებული რეჟიმი აზერბაიჯანის რიგ ქალაქებსა და რაიონებში მოქმედებს, მათ შორის – ბაქოში, სუმგაითში, ლენქორანში, განჯაში, ჯალილაბადში და სხვ. ამ ტერიტორიებზე შეწყვეტილია მუშაობა, მომსახურება და ვაჭრობა ყველა სფეროში, ასევე საზოგადოებრივი ტრანსპორტისა და ავტომობილების მოძრაობა.
